Tambur ka tepsetba atema lanur 6 tepuokdaki yokogo

Agartala, December 11 (Agencies): Küm 3 tejakdang Khowai district, Agartala nung arishi küm 83 tain tambur ka tepsetba ken o nung lanur 6 tashi küm 9 asoshi tepuokdaki yokogo.
Mapang talangka iba ken o angadanga aruba sülen Khowai nung additional District & Sessions Judge Pankaj Kumar Datta-i, Dipu Sabar, Smarajit Khashi, Swapan Khashi, Laxman Khashi, Rajesh Khashi aser Kajal Khashi nunger tepuokdak ayutsü obendang agütsü.
Parnok trok prong ya Khowai kübok Barbaghai tesem nung aliba Khashia Basti nungi lir.
Asangur kari aiür chanu ka mesüshiba ajanga tetsürla tebu jagi March 19, 2013 nung ola adok liasü.
Iba aiürla tebu, Jitendra Debbarma-i, yasür iba ama mapa inyak nungbo majungtsü, ta la mesüshir asem dang ashi.
Iba aonungji item asangurtem jagi parnok den ano nisung kar aniloksemer tetsürlar kidang jagi temesepba chiyungtsü agi meseper arua Jitendra Debbarma dak süng aser oset techira agi azüktsü tenzük.
Parnoki tetsürla tebu Jitendra Debbarma dak yamaji züka aliba mapang Jitendra tebu, arishi küm 80 tain, Arjun Debbarma-i jabaso kümzüktsü aru saka asangurtemi iba tambusang kolak nung süng ka agi tepoktsür jena ao. Iba sülen iba tambusangji parnoki azükba nungi mekümzükteti Agartala Government Medical College nung asü.
Obendanger jagi, tambusang tepsettsü atema parnoki sentong yanglur arua tepset aser ibaji khenyongi ozüng anema lir anungji tai inyakertem nem temerenshi agütsütsü aser ibaji nüburtem asoshia tatishitsü asütsü, ta obendang agütsüba mapang ashi.