Tamenglong district Collector’er ki amak

Imphal, January 10 (Agencies): Hombar aonung Manipur, Tamenglong district nung mejangjatetba nisung kari Collector tepsettsü merang saka pa lendong nung jenbu.
Police-i ashiba agi mejangjatetba nisung kari Collector M.Luikham’er kidang petrol bomb mereplokja pokdaktsü.
M.Luikham’er kima sepia tanükertemi item nisungtem nokdangtsü asoshi anüng nung injang ishika kahatok.
Iba ya telungpurtemi asü koba teloki inyak tang tashi mejangja, kechiyong shingaia tenüng agia mali.
“Bomb ajak agi 9 shi mereplokja pokdaktsü. Onoki ano bomb mapok ishika nguteta lir. Iba amakba nung shinga meyiru aser maneni bushisüngdangdar,” ta police ketdangser kati ashi.
Longkak aitba lanurtem shirnok office tem nung longkak aita nokdaker parnok asü, telongpurtemi inyak’ar tang tashi mejangja,” ta paisa shisem.
Collector M.Luikham’er ki koba pa indang office lir idakji tanükertem talila mapa lemzsktsüogo aser iba den külemi Luikham nüka mitertem nübo talila agütsüsemogo.
Police-i ashiba agi, tawa tu tata gari anishir ana yirutsüba sülen onoki temolung malemer.
National Highway 37 nung aliba Tamenglong ya India nung sensaktiba District ka lir. November 1 nungi tenzüka United Naga Council (UNC) iba lenmang nokdanga ayu, aser ibaji dang masü UNC pusemertemi sorkar office balala nung longkak aita nokdakdar.