Tamil Nadu Angh-i ‘jallikattu’ atema ozüng ka agizükogo

Chennai, January 21 (Agencies): Honibarnü Tamil Nadu Angh, C Vidyasagar Rao-i state nung ‘jallikattu’ akatsü atema ozüng agizükogo.
Jalikatuu katettsü atema Prevention of Cruelty to Animals Act, 1960 ozüng yanglushitsü asoshi state sorkari benoka liasü aser ibaji Hokolbarnü Union sorkari agizükogo.
“Prevention of Cruelty to Animals Act yanglushitsü atema tanü Angh-i agizükogo. Ibaji Tir, Pranab Mukherjee-ia agizüka lir,” ta tanü Tamil Nadu Chief Minister, O Panneerselvam-i metetdaktsü.
Brihostibarnü Chief minister-i Ato kilonser, Narendra Modi den senden ka mena jallikatu atema jembia liasü. Linük Temzüng 213 nung aliba ama Tir nungi tetuyuba kar agütsüba sülen state sorkari ozüngji benoka liasü.
“Iba ozüngji Tamil Nadu sorkari sangdong aser jallikattu ji nüngdakba telatetba kar kübok state tesem ajaklen akatsü,” ta chief minister-i ashi.
Honibar aonung chief minister Madurai-i aotsü aser Deobar anepdang 10:00 ako nung Alanganallur nung jallikattu saisapong lapoktsütsü. Ano tanga tanüngba district tem nunga minister temi lapoktsütsü.
Panneerselvam-i ashiba agi, assembly senden mezüngnü- Hombarnü amendang state sorkari iba ozüng melenshiba bill ka benoktsü.
Iba ozüng yangluzükli Panneerselvam-i state sorkar aser nüburtem tenüng nung shidi ka ajanga Ato kilonser, Narendra Modi dang pelaba lemsatepa liasü.