Tamil Nadu CM atema Palaniswami tenangzükba agiogo

Chennai, February 16 (Agencies): Brihostibarnü Tamil Nadu nung 13buba Chief Minister menden atema state Angh, C Vidyasagar Rao-i ketdangsüa Edappadi K Palaniswami tenangzükba agiogo.
Tanü nikongdang 4:30 meta Raj Bhavan nung Palaniswami tama tenangzükba agi, iba sülen shilem pezü lemsar minister 30 tenangzükba agiogo.
Yaküm May ita nung AIADMK-i assembly election nung takok anguba sülen ita 10 tsüngda tang agi sorkar asembenbuba tentetogo.
Sorkar tenangzükba agiba sülen taoba Chief Minister, O Panneerselvam’er kidang police tanüker yuja aliba agienadok, iba den külemi chief minister indang emblem aser beacon-a pa gari (TN 04 AX 2345) nungi agienadok.
Palaniswami-i Public, Police, Home, Finance, PWD, Highways & Minor ports aser Personnel & administrative reforms portfolio tem abentsü.
Palaniswami’er cabinet nung tang tejak tasenpurji Party presidium chairman, K A Sengottaiyan kija lir. Pai school education minister, K Pandiarajan melener.
O Panerselvam aser AIADMK General secretary, V K Sasikala na tsüngda Chief Minister menden raktepdang Panneerselvam camp nung adener minister ji Pandiarajan kija liasü.