Tamil Nadu CM-i Jayalalithaa asüba bushisüngdangtsü tuyuogo

Chennai, August 17 (Agencies): Brihostibarnü Tamil Nadu chief minister, Edappadi K Palaniswami-i, taoba Chief Minister, J Jayalalitaa asüba kuli bushisüngdangtsü atema par sorkari Madras Court retired judge ka leniba nung inquiry commission tentettsü tuyuogo, ta metetdaktsü.
Asür, J Jayalalithaa’er ki Poes Garden ya la memorial agi melentsü, ta paisa metetdaktsü.
Tanü Chennai nung aliba Secretariat nung osangbenertem senden ka ayongzüka jembidang Palaniswami-i, retired judge ji kobi melii shimtsü aser mapang lemsar inyaktsü, ta metetdaktsü.
Palaniswami-isa, taoba chief minister, Jayalalithaa-i kanga junga yimsüsüba ajanga state nem tenüngsang bener arutsü, ta ashi.
“Amma (Jayalalithaa) shirangba ajanga hospital-i anir oa yari. La December 5 nü asü. Lokti balalai jembiba indang osang balala lir, ibayongji iba kuli tejangja bushitsüsa akumer,” ta paisa metetdaktsü.
Jayalalithaa ya trokbenren tashi CM inyaka liasü aser lai la taküm piyong Tamil Nadu state tenzüka aru. State ajungkettsü atema lai anogoshia meranga inyak, ta paisa ashi.
“Lar kiji memorial akumtsü atema aikati mepishir. Nüburtem dang la otsü aser lai inyaktetbatem sangdongtsü atema, iba den külemi la nem akhüm agütsütsü atema lar kiji memorial agi melentsü,” ta paisa shisem.