Tamil Nadu nung Al Qaeda züngsem 3 apu

Chennai, November 28 (Agencies): Tamalen state aika nung aliba court tem nung bomb poklokja amakba ken o nung tai tonglokja alir Al Qaeda züngsem asem puogo.
Tanü Hombarnü National Investigation Agency (NIA) aser Tamil Nadu Police na senteper par asem apu.
Par asempronglaji Tamil Nadu, Madurai yimti nung apuba sülen maneni bushisüngdangtsü atema Karnataka nung Mysore-i anir ao.
Kiralongrar telok, Al Qaeda züngsem asemji Mysore, Chittoor, Kollam, Nellore aser Malappuram nung aliba court tem bomb amshia amakba ken o nung tai tonglokja lir.
Police-i ashiba nung ajemdaker osangbenertemi ashiba agi, parnoki Ato kilonser, Narendra Modi densema linük nung tongtibang lenir aika amaktsü sentong liasü.
Parnokisa, India nung foreign embassies amaktsü sentong liasü.
Tang pua alir asemji M Khareem, Asif Sultan Mohammed aser Abbas Ali nunger lir, aser parnok ket nungisa tapoktsü osettema angu.
Police-i ashiba agi, par asem jagi Tamil Nadu nung Al-Qaeda network achaayanga liasü.
Ano külen NIA-i Al Qaeda züngsem Hakeem aser Dawood Sulaiman na tebushidak lir.
NIA-i bank tem dang Islamic sayutsüngir, Zakir Naik aser pa indang Islamic Research Foundation account anenjang ta ashiba sülen anogo ishika tsüngda par asem apur.
Naik-i Muslim nunger lanurtem alia oa inyaktsüsa tv ajanga sayutsüngia ajungmesor ta pa nem tai tongokja lir.
Bangladesh nung Dhaka cafe amaker kiralongrar kati asüngdangyartem dang, Zakir Naik-i sayutsüngiba o ajanga pa ajungmeso ta shia liasü.
Naik aser Islamic Research Foundation-i tamangba yimsü aser kin nung ajemdaker tsükchiteptsü ajungmesor ta shia November 19 nü NIA-i anti-terror ozüngtem kübok Naik aser IRF anema ken o ka benokogo.
NIA-isa shidi ajanga Union home ministry dang Naik aser IRF indang websites aser online mapatem anenjang ta mepishiogo.