Tamil Nadu nung Cong-i DMK den lokteptsüa akok

New Delhi, January 20 (Agencies): Tanü Congress tatong Tir Rahul Gandhi-i assembly election agitsü aliba state, Tamil Nadu nung Congress lenirtem den senden ka mena state nung tanga party den lokteptsü onük lemtepogo.
Iba senden tembangba sülen osangbener den jembidang Tamil Nadu Congress Committee tongti, E V K S Elangovan-i “Election atema ajaki pei tebilemba onük benoka jembiogo,” ta ashi.
Taoba Lok Sabha election nung state Congress-i tanga party den meloktepi toktep aser menden ka nunga takok mangu. Ano taoba assembly election nungbo parnoki DMK den senteper toktep, saka menden pongu dang angu.
Tamil Nadu nung Assembly menden 234 lir.
PTI den jembidang Elangovan-i party teloktep onük nung state unit jenjang lemsatepsü memelung saka pai, Congress-i tanga party den meloktepi tokteptsü mesüra party kar den lokteper tokteptsüji party bangdakpuri lemtettsü, ta ashi.
Tanü iba senden nung taoba mapang PCC tongtitem aser taoba mapang minister tem-a aika densema liasü.
Taoba ita DMK tongti, M Karunanidhi-i, Tamil Nadu nung taruba assembly election nung tokteptsü atema party-i aniba teloktep nung adentsü asoshi Congress Party-a jaoktsü, ta jembia liasü.
Küm tasenba atongtsü lia DMK tongti leniri, “Teloktep nung adentsü atema party tem jaokba mapang onoki Congress mesentoktsü,” ta jembia liasü.
2013 küm Sri Lanka nung aliba Tamil nunger ken o nung DMK-i Congress den pilaa liasü.
Joko küm 50 jungnüa India south tsütsü aliba state tem nung Congress jenjang mejungi lir, ibayongji parnoki Dravidian party- DMK mesüra AIADMK den lokteper tokteper aser khenkhenbo party kijai tokteper saka takok mengui arur.