Tamil Nadu nung Gaja yipru agi asürtem nisung 33 jungogo

Chennai (Tamil Nadu), Yimpoksüi/November 17 (Agencies): Yashinep ‘Gaja’ ta ajaba yipru mopung tesashi agi Tamil Nadu nung tzüyimkümlen aliba district tem kongshia liasü, aser iba lendong ajanga asür 33 jungogo, ta tanü state Chief Minister, K. Palaniswami-i metetdaktsü.
Salem nung osangbenertem den jembidang Palaniswami-i, iba yipru ajanga tebur 20, tetsür 11 aser tanur ana asü, ta metetdaktsü.
Yashi iba yipru agi Nagapattinam, Thanjavur, Thiruvarur, Cuddalore, Pudukkottai aser Ramanathapuram district tem nung ki aika raksatsüba den alu nung aonsotsü jenti samatsüogo.
Palaniswami-isa, iba yipru ajanga mesü, an aser napong densema kiset shiruru 70 asü aser light indong 30,000 den süngdong 127,000 shi laodaktsü, ta metetdaktsü.
Tang nisung 177,500 shi relief camp 351 nung jenoka lir.