Tamil Nadu nung jallikattu saisapong nung 2 asü, 129 yiru

Trichy (Tamil Nadu), January 22 (Agencies): Deobarnü Tamil Nadu, Pudukkottai district kübok Rapoosal nung jallikattu sentong alidang nashi pongchi azüoker ana asü aser 129 yiruogo.
Asür anaji arishi küm 26, Raja aser Mohan (25) na liasü, aser tenaprong Rapoosal yimtsüng nungi lir.
Pudukkottai Superintendent of Police, J Loganathan-i ashiba agi, nashi pongchi tezü agi Raja aser Mohan naprong kanga mejungi yirutsü. Nashi pongchi azüoktsü merangdang tena rongnung ka tebok yiru aser ka tesaret yiru.
Iba sülen tenaprong Pudukkottai Government Hospital-i anir oa teyari agütsü, saka tesülen asü. Ano jallikattu sentong nung yirur nisung 30-a Pudukkottai Government Hospital-i anir oa yari.
Tanü Rapoosal nung Health & family welfare minister, C Vijaya Baskar-i jallikattu sentong tenzükja liasü aser terepranger nisung 5,000 dak tema adenshia liasü.
Iba sentong nung nashi pongchi azüoker parnok 174 shilem agi aser nashi pongchi ajak agi 210 moapu nung chioka liasü.
Tamil Nadu nung Jallikattu asaya ya nokdanga liasü, ajisüaka iba saisapong melatsü atema Deobarnü state sorkari ozüng ka yanglushiba sülen state nung küm asem sülen tanü iba saisapong asentenshia tenzük.
Jallikattu sentongji Trichy aser Pudukottai district kübok yimtsüng ishika nung kaogo.