Tamil sobaliba kenteneri Jayalalithaa lutsüba atema pua lir

Chennai, October 30 (Agencies): Tamil Nadu nungi sobaliba kentener aser yi anema nokdaker kati Hokolbarnü Tiruchirappalli yimti nung social media ajanga chief minister Jayalalithaa majungba aser yimtsüng ka nung lai jembiba lutsüba dak sentakba nung pua lir.

Arishi küm 54 tain, Shiva Raj, shiba dang Comrade Kovan ta ajar, pa ya Peoples Art & Literary Association (PALA) nung tongti kentener ka lir aser pa apuba ya scientists aser kentener tem aikati aitsür.

Aji oda süaka police officer temi, parnoki pa aputsüsa küli tejangja nguteta lir, ta ashi.

“Pai yimtem anema video aser ken jang social media nung enoktsü aser ibaji ajanga nüburtem anisatsü ana nung lir. Iba ya sorkar aser chief minister maksütsüba maparen lir,” ta police officer kati ashi.

Pai social media ajangasa DMK tekolakba Karunanidhi anema-a tiyazü küli aika prokshiogo.

Pa ya Brihostibar anepdang 2:30 ako nung apu aser iba sülen Chennai-i bener ao.

Kovan-i sorkar meyong TASMAC yi ayokba dena state nung yi meshimeshia shibangtsü akhangba ajanga sorkar kanga tipmetemdaktsüi arur.

Police-i ashiba agi, pa ken nung ‘Moodu Tasmacai Moodu’ (TASMAC shibangang) ta tenloka atenbaji sorkar nemja bilemba ken lir.