Tamil yimsüsüri Sri Lanka Opp. lenisang menden abener

Colombo, September 03 (Agencies): Sri Lanka parliament-i Tamil nunger yimsüsür ka nem tongti opposition lenisang menden abentsü maongka tanü Brehostibar nü agütsüogo.

Nütsüng yongsük tajemba aliba Tamil nunger yimsüsür, arishi küm 83 tain Rajavarothiam Sampanthan-i opposition lenisang menden tan benokba ya küm 32 tsüngda nung tan mezüngsüa Tamil nunger yimsüsür kati iba tongti menden abentsü maongka angur lir.

Ano, Sampanthan nem iba maongka agütsüba ajanga nübur o nübur rong nung mangatettep tulu adoka küm jenti tongpang raraba Sri Lanka nüburtem rong nung tanaben sentaktepshiba kuli angur lir.

Sri Lanka nung nütsüng yongsük timba ka Sinhalese kin lir aser parnoki tentetba sorkari Tamil Tigers telungpurtemi timtem agütsüba dak ajemdaker Tamil kin küm 30 dak tema rishikanga ajembanga ayuba osang bushiteta lir.

Aji oda, Tamil National Alliance (TNA) yimtenren telok lenisang, Sampanthan-i 1983 sülen tan mezüngsüa yimtenren shilem nung tongti menden abentsü maongka tulu nguogo.

Parliament speakersangia Sampanthan tongti opposition lenisang menden abentsü asoshi shimokbaji agizükogo.

“Sorkari magizükba linük nem tajangzük bener arutsütsü onük ajunga nung sorkar anemtsü renema lir. Ano, nungdakba onüktem nungbo sorkar den pusemtsüa renema lir,” ta opposition lenisang akümba sülen mezüng parliament nung onük jembidang Sampanthan-i tanü metetdaktsü.

Okatsür Sampanthan ya mezüngsüa parliament nung 1977 küm shimok aser taküm January ita agiba Tir election nung pai aniba TNA yimtenren teloki taoba Tir, Rajapaksa madak takok anngusang, Maithripala Sirisena pusemba osang jangjaogo.