Tamshidak sen anentsüba ajanga ochimashi nokdangtsü : Modi

New Delhi, November 09 (Agenices): Sen 500 aser 1000 note amshiba anentsübaji India nung ochimashi nokdangtsü atema lir, ta tanü Ato kilonser, Narendra Modi-i metetdaktsü.
Iba telemtetba agiba atema film industry aser tanga fraternity temia tenüngsang agutsüogo.
Ato kilonseri iba telemtetba agiba atema Karan Johar, Rajnikanth, Ajay Devgn, Kamal Hasan, Nagarjuna, Ritesh Deshmukh, Subhash Ghai, Siddharth Malhotra, cricketer Anil Kumble aser Harbhajan Singh nungeri twitter ajanga Modi nem tenüngsang agütsü.
Actor, Kamal Hasan-i, “Iba telemtetba ya yimtenren party aikati pelaa agizüker. Talisa saru tim agütsürtemi pelaa agizüker,” ta ashi. Ibaji langzüa Modi-i twitter ajanga, “India tajungba kümner ochishir sensotem atema iba telemtetba ya agi,” ta ashi.
Ano Superstar Rajnikanth-ia, “Tenüngsang agütsür @narendramodi. Iba ya India tasen ka asoba lir,” ta ashi.
Sufi kentener, Kailash Kher-ia twitter ajanga, “Alima putiotsü nung iba ya putisütsü anogo ka lir. Asen linük Bharat-a kobi melii terenlok aliba linüktem rongnung adentsü. @narendramodi Tsüngremi na moajang,” ta lemsatep, aser ibaji langzüa Ato kilonser Modi-i, “Ochimashi yimyatem aser black money anentsütsüla, aser ibaji ajanga dang terenlok nung asenoki jenjang tasen ka angutsü,” ta ashi.
Ano actor Nagarjuna-i twitter ajanga lemsatepba ka langzüa Modi-i, “Iba telemtetba ajanga ochimashi, black money aser sen taila nokdangtsü, koba ajanga asen terenlok anüdaktsür,” ta ashi.
Ato kilonserisa, “India azükarutsü aser ochimashi malitsü atema asenok ajaki longjemer inyaktsüla,” ta shisem.
Yasüng tesü Ato kilonser Modi-i, tang amshiba Senpak 500 aser 1000 na amshiba anentsü, aser iba ya black money aser ochimashi nokdangtsü atema lir, ta linük nüburtem dang sangdonga liasü.
Modi-isa, Rs 500 aser Rs 1000 notes ji November 10 nung December 30 tashi nung taa kecha magütsüi post office aser bank tem nung melentsü akok. Kuli balala ajanga December 30 tashi nung Rs. 1000, Rs. 500 notes memelentetertemi 2017 küm March 31 nü tashi nung ID proof agüja melentsü akok, ta metetdakja liasü.