Tan agiba election ajanga Bihar tia latettsü: PM Modi

Patna, October 27 (Agencies): Tanü Bihar, Sitamarhi district nung election nüboyim senden ka nung jembidang Ato kilonser Narendra Modi-i, kanga junga shisadanger ang vote agütsütsüla, ta ashi.

“Tarutsü atema shiba dak temelung alemtsüla, ibaji nenoki lemtettsüla. Tarütsü atema nai temelenshi kar nüngdaka lira, ibaji terenlok lir,” ta pai ashi.

Opposition party tem aitsüba olen ka nung Bharatiya Janata Party (BJP) lenir aser Ato kilonser Modi-i, “Külen terenlok aser külen maongka bushiba lir,” ta ashi.

Bihar tebilemtsü ajak atema lenmangji Modi masü saka terenlok, aser Bihar nung terenlok ali nungang linük nung terenlok alitsü, ta paisa ashi.

“Iba ya takok anguba mesüra tamakok anguba indang ka masü, saka iba ya Bihar tarutsü tia indang lir,” ta pai ashi.

State nung electricity, tzü, gari lenmang, shisaliok, lanurtem atema mapa aser anema alibaren jenjang ajungtsü nüngdak, ta paisa ashi.

“Ni (Bihar nem) senotsü crore 50,000 crore agütsütsü nangzükogo. Onok tashii aruba sülen onoki sen lakh crore 1.65 agütsüogo,” ta pai metetdaktsü.

“Onoki kibong shia nem electricity agütsüner. District shia nem crore 250 nungi 300 agütsütsü onoki lemtetogo,” ta paisa metetdaktsü.

Bihar Chief minister Nitish Kumar densema BJP opposition party tem aija Modi-i, opposition party temi yazü nung BJP-i aniba teloktep nem tai tongloktsür, ta ashi.

Nitish Kumar aser RJD tongti, Lalu Prasad na aitsüba olen ka nung Modi-i, Bihar ji 18th century-i meyipa bener motettsü, ta ashi.

October 12 nü nungi Bihar nung assembly election telemsa pongu nung agi tenzükogo aser November 5 nü election tembangba sülen November 8 nü vote azüngtsü.