Tan Diwali nungbo nüburtem mepelar: Sharad Yadav

New Delhi, October 18 (Agencies): Tan benjung mongpu nungbo nüburtem mepelar, aser iba ya demonetisation aser GST ajanga linük rongsenkettsüng nung kongshiba ajanga lir, ta tanü Rajya Sabha MP, Sharad Yadav-i ashi.
Paisa, tesüiba küm asem nung nashi kümzükba, “ghar vapsi” aser “love jihad” nüngtem nung communalist amenokba ajanga nisungtem tsübuteper, ta ashi.
“Tan benjung mongpu, talisa Diwali benjung mapang, India nüjiso ngur sülen tang mezüng India nunger mepelar. Iba ya demonetisation aser GST ajanga rongsenkettsüng kongshiba ajanga lir,” ta pai sangdong ka ajanga ashi.
Shishilembaba tesemtem azüng-azünger, ta shia Yadav-i, “Shishilembartem aser tilateri shishirtem mepelar, kechiyong parnok shishilembaba jenjang ajema aluogo,” ta ashi.
Taoba mapang JD(U) tongti, Yadav-i, aluyimertemi parnoki züsentetba chiyungtsütem atema jenjang shidak akhangdang talirtemia linük nung jenjang kanga atuba timtem ajangshir, ta ashi.
“Modi sorkari alima nung fertilizer jenjang aluba tajangzükji aluyimertem nem magütsür. Talirtem atema osettsüset aika nung jenjang kanga tuogo, kechiyong tamalen saru shilem 15 agia aliba nungi tangbo shilem 18 tashi agir,” ta paisa ashi.
Nüburtem timtemba atema sorkari mebilemtsür, ta shia Yadav-i, sorkar sentsüh atema sorkari kangabo mebilemtsüla, ta ashi.
“Sorkar sentsüh timba kümaka alima metembangtsü, anungji pei linük nung nüburtem anisüngzükdaktsütsüla,” ta shia pai sorkar dang nüburtem yaritsü atema mera agia inyaktsü takhangba agütsü.