Tan election nung sen ajanga shilem agiogo: West Bengal Congress tongti

Kolkata, May 19 (Agencies): Brihostibarnü Kolkata nung West Bengal Congress tongti lenir, Adhir Ranjan Chowdhury-i, West Bengal assembly election nung party-i tamakok anguba atema tatemsü kecha meshiner, ajisüaka tan election nung sen ajanga shilem agiogo, ta aitsü.
“Tamakok kaji tamakok. Iba atema ni tatemtsü kecha mejembiner. Ni shinga maitsüner. Nüburtemi Mamata Banerjee (Chief minister) nem vote agütsüba tajungba asütsü ta bilem,” ta Congress lenirisa ashi.
Chowdhury-i, “Tamakok anguba indang kuliji aika lir aser item kuliji onoki bushitsüla,” ta ashi.
“Iba election nung sen ajanga shilem ka agiogo. Tamalen nisungtemi tashiyim amshia liasü, ajisüaka tangbo sen tashi densema amshi,” ta paisa ashi.
West Bengal nung election nüboyim mapang nung opposition party temi Saradha aser Narada ochimashi ken o nung Chief minister, Mamata Banerjee-i aniba Trinamool Congress sorkar aija aruaka parnoki takok nguogo.