Tan hopta Lahore nung BSF aser Pak Rangers ken o jembitsü

New Delhi, July 24 (Agencies): Tan hopta Lahore (Pakistan) nung India aser Pakistan linük naprong nungi arrtsü anüker sepaitem tsüngda ceasefire ozüng alema inyakba, arrtsü telungi aitba aser International arrtsü nung ozüng alema lungki atuba onüktem nung ken o jembitsü.
Linük ana tsüngda DG-level ken o jembiba senden ya küm shia anaben amener, ajisüaka aiben tesentaktep raksaba ajanga iba senden mekateti aruogo.
Ketdangsertemi ashiba agi, Border Security Force (BSF) aser Pakistan Rangers sendenji July 27-28 anogotem nung amentsü, aser India tsütsülen nungia BSF Director-General, KK Sharma lenisüba nung ketdangsertem iba senden nung adentsü atema Hombarnü Pakistan-i apusoa aotsü.
Ano India nungi tanga züngsem 22 ji Amritsar nung aliba Attari-Wagah arrtsü adena aotsü.
BSF aser Pakistan Rangers tsüngda tesüsabuba senden yaküm September ita Delhi nung mena liasü.
Ketdangsertemi ashiba agi, 2015 küm Jammu & Kashmir nung ceasefire ozüng alema aiben inyaka liasü, ajisüaka yaküm September nung linük ana tsüngda senden amenba sülenbo International arrtsü nung ozüng alema inyakba tajemba kümogo.
Ajisüaka arrtsülen maneni temesepba mozü shibelenba aser ozüng alema arrtsü adena aitba tebilemtsübo kar.
Ketdangsertemisa ashiba agi, linük ana tsüngda tesentaktep ken o aika aliba ajanga linük ana arrtsü anükertem tsüngda senden talangka makateti aruogo.
Taoba mapang Delhi nung senden amendang, arrtsülen nüburtem taküm mesamatsü atema mortar shells ama raraba oset tesashi mamshitsü atema linük ana tsüngda bangjema liasü.
Iba senden nungjisa, Jammu & Kashmir, Punjab, Rajasthan aser Gujarat arrtsülen rara adokba osang tekaraba nung metetpelatsü atema BSF aser Pakistan Rangers naprong nungi directors-general densema ketdangsertem tsüngda mobile numbers, email ID aser fax numbers lemsateptsü melungtepa liasü.