Tan ita Sushma-i Myanmar semdangtsü

New Delhi  August 18 (Agencies): Myanmar nung sorkar tasen, Aung San Suu Kyi’er National League for Democracy (NLD) sorkar yimsüsüba aruba sülen tang mezüng August 22, 2016 nü External Affairs Minister (EAM), Sushma Swaraj-i iba linük semdangtsü, ta tanü sorkar sangdong ka ajanga metetdaktsü.
Brihostibarnü External Affairs Ministry-i sangdong ka ajanga, “EAM-i semdangba mapang lai Republic of the Union of Myanmar Tir, U Htin Kyaw ajurutsü aser state councellor aser Foreign Minister, Daw Aung San Suu Kyi ajurua senden amentsü,” ta metetdaktsü.
“Iba mapang nung linük ana tesentakatep nung rangloker o lemtepba den külemi India nung ayonga aliba taruba BRICS-BIMSTEC Outreach Summit atema jembitsü,” ta sangdong nungsa shia lir.
Ministry-isa, India aser Myanmar na tesentaktep junga lir aser aluyimba, IT, human resource development, infrastructure development, sobaliba terenlok nung amalitep kar, ta ashi.
“Tang semdangtsü aliba ya ajanga Myanmar sorkar tasenbai tongtibang, ta bilemba onüktem nung India-i amaliteptsü nangzüka aliba inyaka sayur,” ta ministry-i ashi.
Myanmar semdangba mapang Foreign Secretary S. Jaishankar aser Ministry of External Affairs nungi tongti ketdangsertemi Sushma miena aotsü.
New Delhi nung 15buba Foreign Office Consultations mapang India aser Myanmar na tsüngda temaba jenjang nung ketdangsertemi linük semdangtepba, security aser defence dak sentakba onüktem, arrtsü onüktem, shishilembaba, terenlok  nung amalitep, connectivity, sobaliba densema tongtibang onük aika nung o lemtepa liasü.
Taküm March 30 nü Myanmar nung NLDi sorkar tasen akumba sülen June 16 nü Ato kilonser, Modi tenüng nung National Security Advisor, Ajit Doval-ia Myanmar semdanga liasü.
Taoba ita Minister of State for Association of Southeast Asian Nations (Asean) Foreign Ministers’ senden alidang Suu Kyi-ia lai India semdangtsü tebilemba lir, ta shiogo.
Lar linük temzüng aajanga la Tir akumtsü memelaba ajanga la State Counsellor aser Foreign Minister dang inyaker.