Tan Lok Sabha election nung sen timba amshitsü: Krishnamurthy

Hyderabad, March 08 (Agencies): Tanü taoba mapang Chief election commissioner (CEC), T S Krishnamurthy-i, yimtenren party tem tsüngda rara kanga lir, ibaji nungji ajemdaker tan Lok Sabha election nung sen timba amshitsü, tesempa aser rara timba adoktsü, ta ashi.
2004 küm Lok Sabha election ya Krishnamurthy CEC asüba mapang nung agia liasü.
Tang tashi Lok Sabha election agitsü atema Election Commission-i anogotem mesangdongba atema opposition party tem nungi lenirtemi ashishibaji tai, ta pai ashi.
Taruba Lok Sabha election dak sendakba nung osangbenertemi asüngdangba langzüdang pai, “Sen timba amshitsü, rara timba alitsü aser tesempa taliba adoktsü, ta ni bilemer,” ta ashi.
“Yimtenren party tem tsüngda raratepba apibo timtem aika adoktsü. Iba ama tensa ka nung EC atema tayongzükba tulutibaji model code of conduct (MCC) mapa küma benokba asutsü,” ta pai ashi.
Ajisüaka EC-i item tayongzükba koktettsü imlar, ta Krishnamurthy-i ashi.
Lok Sabha election atema EC-i tang tashi anogotem mesangdongba atema opposition lenirtemi ashishiba dak sendakba nung pai, “House tentettsü atema anogo ka lir. Lok Sabha tentettsüsa sentong renema lira item telemtetba agitsü atema EC nem telemtetba agidaktsütsüla, kechiyong parnoki state balala tensa asadangerang telemtetba agitsü,” ta ashi.
EC-i parnok teinyaktsü mapa dang inyakra parnok mapa mashishitsüla, ta pai ashi.