Tan SAG nung India o Nepal tetsürtem final asayatsü

Shillong, February 14 (Agencies): Taoba küm takok ngua alir, India tsür football telok aser Nepal tsür football telok na tan South Asian Games (SAG) football final asaya Hombarnü Jawaharlal Nehru Stadium nung asayatsü.
Group tarensen nung India teloki point 8 ngua tanabuba jenjang tongtet. Parnok group telemsa nung asayaba mapang Nepal aser Maldives den goal ka ka danga meyoki anaben tashi draw asü saka Sri Lanka madak 5-0 aser Bangladesh madak 5-1 agi takok ngua liasü.
Nepal asoshi India den asayatsüji kanga saksaker asütsü kechiba süra parnoki ano tang tashi nung goal ka danga meyoki lir saka India-i bo goal 10 tashi yoka lir.
India team nung Head coach Sajid Dar-i, “India team-i goal medal ngunera kangsa meranga asayatsü nüngdaker. Kechiba süra Nepal team-i parnok den asayartem koma sür anidaktsütsü aji kanga junga meteta lir,” ta ashi.
“Onoki Nepal team kanga akhümtsübur ajisaüaka parnok akoktsü asoshi onoki kanga meranga asayatsü,” ta Dar-i ashi.
U-23 head coach Lee Johnson-ia tetsür team dang takok angutsü atema meranga asayatsü shiogo.
“Onoki parnok asayaba match ajak kanga junga repranga aruogo aser nenoki junga asayar takok angutsü onok teimla lir,” ta Johnson-i ashi.
Bangladesh den semi final asayadang India team captain asüsang Narayan Das-i India tetsür team final tongtetba atema pelaba lemsatepogo.
Pai, “Teti asayaba ama junga asayangma. Nenoki onoka tejak tentetdaktsür. Gold Medal ji angutsü meranga asayang ma,” ta ashi.
Nenok ajaki onok atema bilemtsüba aser tepela lemsatepba asoshi kanga pelar aser onokia ashiba ama meranga asayatsü, ta Dar-i lemsatepogo.