Tan tasoba anogomong yabo khenyongi balaka: Kareena

Mumbai, September 21 (Agencies): Bollywood actress, Kareena Kapoor Khan-i, la tang mezüng tanur asotsü aliba ajanga la arishi küm 36 ajungba anogomong yabo khenyongi balaka lir, ajisüaka benjung sentong kecha renema mali, ta ashi.
Kareena tanü, September 21 nü arishi küm 36 jungogo, aser iba anogo nung lai lar kibong aser medemertem den amongtsü, ta ashi.
“Tan yabo (birthday) khenyongi balaka. Ajisüaka benjungtsü atema sentong balaka renema mali. Ni kü tasoba anogomong ya kümshia amongba ama kinunger aser medemertem den amongtsü. Party malitsü. Ni chiyungtsü aika achitsü aser anisüngzük dang anisüngzüktsü,” ta Kareena-i ashi.
“Ni asoshibo kü tembartem, kinungertem aser kinungbuji ni temeimtiba nisungtem lir. Ni parnok kümzüker aser parnok anepalur,” ta lai ashi.
Kareena Kapoor aser actor kinungbu, Saif Ali Khan na mezüng chir taküm December ita nung asotsü.
Kareena-isa ashiba agi, tetsü, Babita aser teyi, Karishma Kapoor nati la dang mashisa aliba mapang teinyaktsütem kangabo mashir.