Tan test match tanabuba menepa Binny-a yoktsü

Mumbai, August 16 (Agencies): Board of Control for Cricket in India (BCCI)-i Karnataka nungi cricket asayar all-rounder, Stuart Binny-a tang India aser Sri Lanka na tasayadak aliba test series tanabuba match metenzükdang team India dangi yoktsü metetdaktsüogo.
“Tan asaya asem Test series Sri Lanka nung tasayadak aliba nung All-rounder Stuart Binny-a India team tanabuba match masaya tsüngda team dangi yoktsü,” ta BCCI-i sangdong ka ajanga metetdaktsü.
Aji oda süaka, BCCI-i shinga yiruba osang mashi aser Binny züngsema India team nung nisung 16 ajungtsü.
Murali Vijay tetsüng nung tezü atsüpetba ajanga mezüngbuba match masayatet saka Colombo nung Brihostibar nü nungi tenzüka asayatsü aliba, tanabuba match nungibo asayatettsü imlar.
Binny-i tang tashi nung test match asemben asayadanga lir aser pa adenba ajanga team tali tajungba akümtsü. Team captain Virat Kohli-i mezüngbuba match nung bowler pongu nem ball ontakja liasü saka India-i runs 63 agi makok.