Tan US Tir adoksang Trump-i lungjemtsü jazüker

United Nations, November 13 (Agencies) : Tan Tir election nung Donald Trump takok anguba sülen nungi Boston, Chicago aser Detroit yimtitem dena yimti aika nung pa election nung adokba anema longkak aita liasü.
US Tir asütsü asoshi tan election nung adoker alisang Donald Trump-i election mapang kanga kukua nübuyimba sentong tembangba sülen lungjemtsü atema jembiba UN Secretary-General Ban Ki-moon-i pelashishia agizük.
Taoba Hokolbar nikongdang United States nung Trump anema longkak aitertem ayimtenba tiyalong nung Ban-i phone nung jembidang United States of America nung Tir 45buba asütsüsa Trump-i election nung takok anguba atema ano khen tenüngsang agütsü, ta UN otongdar Stephane Dujarric-i ashiba Xinhua news agency osang ajanga metetdaktsü.
“Trump-i kanga arina takok anguba sülen lungjemtsü atema jembiba osang UN Secretary-General Ban-i kanga pela agizük,” ta otaongdar jagi ashi.
Taoba Bodhbarnü Trump-i election nung takok anguba sülen Boston, Chicago, Detroit, Miami, New York, Philadelphia aser San Francisco yimtitem nung nüburtem gari lenmangtem sünga adenshir billionaire Trump election nung adokba anema longkak ait meso. Iba longkakji taoba Hokolbar aonung tashi aita liasü.
UN Secretary-General-i, “Alima rangben nung yimjung aser security renloktsü atema US aser UN na tsüngda akhi ama tesendaktep tajung lia tangatettep nung inyaktsüla,” ta ashiba otongdar jagisa metetdaktsü.
January 20, 2017 nü Trump US Tir atema tenangzükba agitsü lia December 31, 2016 nü Ban menden nungi alutsü. Pai UN Secretary-General ka ama mongpu ana tema (küm 10) inyakogo.