Tanaben Jangjashitsür

~ T. Meren Paul, Tzüwar Apartments, Lower PR Hill, Kohima.

November 4, Tir Yimyim adok nung O Semlok ta sür adianu L. Ngangshi Jamir, Mokokchung village nungi züngyazüngkutepba indang pai angatetba züngyazüngku aser tenangzüktep agiba na ya balala ta lai tsütsü aser tangatetba lemsatepogo. Lemsatepba rongnungi ni züluba azüngashiba “Oath” “Swear” koba ratettsüogo ibai lepshia shia aliba agi ni anosa ya jangjashitsünür. Tenangzüktep ta süra iba dangji English nung “Agreement” ta dang meyiptettsü saka ni zülubajibo “Oath”, “Swearing”, “vow” koba dang azüngashiba ta ajatsü iba indangji züluogo.
ABAM-i September 30 nü Tir Yimyim nung adoktsüba mezüng paragraph nung, “Anempongba, Azüngashiba aser Akhi yimsü yimya” indang shisema aliba nungi ni azüngashiba indang mapa balala rateta züluogo. ABAM-i Tir Yimyim nung adoktsüba nungji züngyazüngkuba ta kecha nunga zülua mangu saka azüngashiba ta sür adoktsüogo, yamaji azüngashiba indang telemsa ratettsütsü ni merangogo saka zülua maliba züngyazüngku indangbo ni metangshi. Tazünger ajak tangatetba kasa masütsü saka shirnoki mapa agi ajangshia lir parnoki tekeraba aser tajungba angajemtsü. Tatishitsü agi asenoki affidavit paper nung, “Ni yangi kechi shia züluogo aji teyazü masü saka ochi” ta zülubaji tenangzüktep masü saka azüngashiba mapa. Passport application nung,” Ni India senso, ni kodanga bataki (jail) mao, kecha court nunga ni anema ken o benoka mali” ta zülubaji tenangzüktep masü saka azüngashiba mapa. Züngyazüngku süra arasenba densema inyakba mapa ta angateter saka azüngashibaji arasenba den sentaktepba mapa masü. ABAM-i züngyazüngku indang shinür sürnung aibelena azüngashiba ta zülu asü?
President, Governor, Judge, Commission member menden nung amentsü asoshi “Oath” agir, MLA/Minister menden nung amentsü asoshi “Swearing in” agir, Sepoy/Police passing out ceremony nung kusum “Oath” agir saka itemji, tenangzütep “Agreement” masü saka azüngashi agiba ta kenyongi mapa tebentet balala ta angur. Kiyimertem kulizüng agiba ta asübaji English nung wedding/marriage vow, ta asüba nungi meyipzükba saka wedding agreement ta majar, anungji tenangzüktep ta masü azüngashiba ta Ao nungji meyipzüktsü. Azüngashiba aser tenangzüktep anaprongji tetezü anasatepba alitsü sudi saka tenangzüktepji teladakba aser aiben madaloktsür mesüra telok kadi tatem kümdaktsütsü akok saka azüngashibaji kanga tarok aser talenba ka keta lir aser aji inyaktsüla. Kiyimertem azüngashibaji tasü agi mepila tashi apuani süa alitsü Tsüngrem tsüngdang azüngashiba. Tsüngrem tenzükba wadang nung-a shirnoki Tsüngrem den azüngashi masü saka tenangzükba nung dang inyakdir parnok tenzükba mapa nung nübor temoatsü tulu ngua meinyaktettsü.
Taküm yim kar nung ataloktsüsa mapangi bentsür aruba osang ajanga ABAM atongba agi iba sangdong agütsüba indang Tir Yimyim November 4 adok nung züluba kasa osang kaket November 5 adok nung adianu J. Tali Pongen ajanga iba ken O ya Yimjenkimong aser Changtongya yim na tsüngda atalokba ta jangjatsüba ajanga item ken o kecha mangashii aliba tang angashir saka ni koba azüngashiba indang rasaa züluogo, ibajibo iba ken o nung rangloker masü saka nüngdakba aser amshia aruba indang züluogo, anungji kar anema mesüra puküma zülu masü ta janghjashitsür aser angatetdaktsüner.