Tanaben mesora Tsüngrem yimli-i aitsü makok

~ L. Kika Pongener.

Yisu alima nung alidang, Yihuda nunger yimsusur aser Farise nisung ka tenung agi Nikodima, aonung ayaterm mapang ka nung, Yisu dangi arur teti taküm senmang tekümtet angutsüba indang metetnua asüngdang. Aser Yisu-i pa dang langzüa ashi, Nisung kati tanaben mesora pai Tsüngrem yimli angutsü makok. “Atangji züngpong ni ne dang shidi, nisung kati tanaben mesora pai Tsüngrem yimli angutsü makok” (Yohan-3:3). Ajisuaka, iba o jagi Nikodima kanga sungmang, Nikodimai Yisu dang ashi, nisung ka tambur kümer pa kechi koda tanaben asotsü ? Pai pei tetsü poki tanaben tur ano asotsü no ? Anungji ano tanaben Yisu-i pa dang jangja-jangja ashi, “Atangji züngpong ni ne dang shidi, nisung kati tzü aser Tanela nung mesora Tsüngrem yimli-i aitsü makok. Shi nungi kechi sodir aji shi lir aser Tanela nung kechi sodir aji Tanela lir. Nenoki tanaben asotsü tim ta ashi nung tesungmang” (Yohan-3:4-7).
Ano tanabena Nikodima-i aji mangateti, Yisu dang asüngdang, Itemi kodaser sutettsü? Yisu-i pa dang ashi, Na Yihuda nunger tesayur ka lir aser nai itemi memetet no ? (Yohan-3:9-10). Atangji, Yisu-i Nikodima dang ashiba ama, khristan taküm ka temenen nungi temulung meyipa Yisu Khristaji kü kümtetdakba aser Kibur ta temulung nung amangtsü aser tebang agi nangzüktsü aser tzü nung baptia Tanela nung tanaben mesora kodak yimli-i angutsü makok. ” Kechiaser nai ne tebang agi Yisuji Khrista ta nangzükra, aser ne temulung nung Tsüngremi pa tasü nungi shia arudaktsü ta amangra na kümzüktsü. Kechiyong Temeshiba akümtsü asoshi nisungi temulungjang telung nungi amanger, saka tekümtet angutsü asoshi tebang agi nangzüktsüla ” (Rom-10:9-10). Yisu-i Nikodima dang ashiba, ” Shi nungi kechi sodir aji shi lir aser Tanela nungi kechi sodir aji Tanela lir ” (Yohan-3:6). Atangji shi nungi asobaji asenok mimchir taküm ka mezüng pei tetsü pok nung asoba-ji lir, Yisu-i Nikodima dang, ” Shi nungi kechi sodir aji shi lir ” ta ashibaji ibaji asütsü sudi. Ajiser, iba sulen asenok temenen nungi temulung meyiper Yisu Khrista agizüka taküm tasen ka kümshir, iba taküm-baji, “Tanela nungi kechi sodir aji Tanela lir ” ta ashiba, tanaben asoba taküm-ji asütsü. Asenok alima shi nung tetsü pok nungi mezüng asobaji aji jabaso tambusang amai lir, ajiser tanaben Tanela nung khen tasen ka asobaji jabaso tanübosang amai lir.
Ajisuaka, koba teti taküm senmang “Tekümtet” lir, ibajibo mezüng asoba jabaso tambusang koba tetsü pok nungi asor, pa nem masü, saka tanaben asoba jabaso tanübosang ‘Tanela nung tanaben aso-sang’ pa nem-ji dang agütsütsü. Iba indang tejangja angatettsü atema asenoki Abraham dang Tsüngremi pa kin tuluka tebu kümdaktsütsü nangzük, saka pa senmanger techir mali asü, aser Abraham o tebutsü Sarai nati par kidang aliba alar-tsür Hagar ajanga jabaso Ishmael aso. Ajiser, jabaso Ishmael-ji Tsüngremi nangzükba jabaso senmangbaji asütsü sudi ta bilem. Ajisuaka, Tsüngremi Abraham dang ashi, iba jabaso Ishmael-ji senmangbaji masütsü, saka shidakba Sarai nu-menden ajanga dang asotsü. Iba sulen Tsüngremi Abraham dang nangzükba ama jabaso Isak tena nem moatsü. Iba jabaso Isak koba tanaben tena nem moatsü, iba-jiang shidakba senmangbaji liasü. Ano Isak-er kibong nunga mezüng jabaso tambusang Esau liasü, iba sulen tanabuba jabaso tanübosang Yakob aso. Ajisuaka,Yakob-i tebu nungi tedi Esau meyong tambu senmang rakzük.
Anungji Isak-er jabaso ana rongnung-a senmangbaji tambusang Esau masü, saka tanübosang Yakob-jiang liasü. Atangji Tsüngremi küm merijang aika jilia Yisu-i Nikodima dang sayuba lesson teti taküm senmang, koba “Tekümtet” lir ibaji mezüng tetsü pok nungi asoba jabaso tambusang nem masü, saka Tanela nung tanaben asoba jabaso tanübosang nem-ang agütsütsüba, iba indang mangdang jilia ‘Drama’ ka yia sayuba sudi ta asenoki rajema angateter. Kechiyong ‘Ishmael o Esau’ naji jabaso tambusang sernung tena nem tambu senmang magütsü, saka tanaben asoba jabaso tanübosang ana ‘Isak’ o ‘Yakob’ na nem-ang senmang-jibo agütsü. Tetezü…Teti taküm senmang “Tekümtet” ji-bo tetsü pok nungi mezüng asoba jabaso tambusang nem masü, saka tanaben asoba jabaso tanübosang nem-ang agütsü. Teti taküm senmang ‘Tekümtet’-ji tetsüpok nungi mezüng asoba nem masü, saka Tanela nung tanaben asoba nem-ang agütsütsüba. Atangji, iba Tsüngrem-er mangdang Tanela lesson ya asenok atema tesungmangtsüka lir. Ano Yihuda nung tesayur takar kati kenu anogo Yisu dang teti taküm senmang amangtsü asoshi kechi inyaktsüla ta asüngdang (Mark -10:17-19). Saka Yisui pa dang ozüngtem benshiang ta ashi, saka iba Farise nisung yagi lanuwa nungi ozüngtem ajak benshia aru ta langzü.
Anungji Yisui pa dang “Na langka kati madoksa, oang na akaba ajak yokang aser sensaker nem lema agüjang, aser na kotak nung rongsen akatsü. Saka iba o jagi pa mepelai aküm aser oadok. Tanü putu nunga tamanger aika Nikodima & Farise nungba takar-sang amaji tanaben asotsüba indang tejangja mangatetba aser tekümtet akatsü atema madoksa sernung pei sasa adoksar ama bilemba tamanger aika lir. Tekümtet maka sernung kar amai, pei sasa pei dak temulung alemba tamanger aika lir. Atangji Khristan ka tanela nung tanaben maso tashi aser Tanela Temeshi maka tashi Tsüngrem meyong masü, aser Tsüngrem meyong maküm tashi teti taküm senmang angutsü makok. Ajiser teti taküm senmangji maka-ra asenok amangbaji amajok asütsü. ” Saka Tsüngrem Tanela nenok dak lira, nenok shi yimya nung masü saka Tanela yimya nung lir. Saka shiba dak Khrista Tanela mali paji pa meyong masü ” (Rom-8:9). Aji oda, asenok Tanela nung tanaben maso tashi teti taküm senmang ‘Tekümtet’ angutsü makok. Aser Khristan taküm ka kotak yimli senmang tekümtetji mongutetra amangba amajok asütsü.