Tanabena aochir

Asenoki Tsüngrem dang nangzükba shitak meinyakteti aibelenba sülen aiben asenoki Tsüngrem tsüngdang nungi ajentsü meranger, kechiyong asenoki tanaben taidok mangutsüla amai bilemer. Sentepi  ooya liasü saka aibelenba agi sentepi maor, sarasademba taküm ka liasü saka Tsüngrem dang nangzükba meinyaktetba ajanga sarasadem anener. Tangar den Tsüngrem temeim indang lemsatepa liasü saka khen tanüla nung tamakok anguba ajanga Tsüngrem temeim indang kuli süya aliba anenadoker. Ajisüaka, asenoki angatettsüba kaji asenoki külemba Tsüngrem ya aibelenertem dang taidok agütsüba Tsüngrem lir. Mapang ka Yisu nütsüng Peteri tangar ajaki Pa toktsüaka paibo metoktsütsü ta nangzük ( Mathi 26:33). Ajisüaka, kodang pai nangzükba Kibuba Yisu Khrista shi nung Paia Pasasa mekümzüktettsüsa tensa tia ka ajuru, Peteri Yisu Khrista yutsür ajenba dang masü saka pai Yisu Khristaji kodanga majurudang aser shibaar temeteta memeteta ta tangar tsüngdang nangzükba Mathi tapu 26 nungsa shia angutsü. Aji oda, Peteri Kibuba Yisu tsüngdang nangzükba raksa aser pai aji bilemteta kanga kua ajep ta asenoki Luke tapu 22 nung shia angur. Tanüa Peter amaji Tsüngrem dang nangzükba raksartem aika alitsü. Asenoki mapang tajung nung Tsüngrem külemner saka kodang alima tsüngdang asenok timtem maksü ajurutsüsa tensa tia ajurudir, asenokia Peter amaji Yisua kodanga majurudang aser memetet amai asen taküm jakla yimya agi sayur. Ashiko, asenok aikati election matongdangbo Yisu sülen anidaker tajung ka ama anidaka alitsüa akok, Idangjibo, election-a arung taru nibo Kibuba Yisui mulungba danga inyaktsü ta nangzüktsüa akok. Ajisüaka, kodang election mapang atonger idangjibo Yisua memetet amai akümba purtemji asenok asütsüa akok. Aji oda, asenoki rongsen angutsüba lenmang memetet  dangbo pei akaba rongsen tera agi tenük sünger anogo shia Tsüngrem tenüngsanga aliba taküm kibong asütsüa akok. Ajisüaka, kodang mapa meinyakyonga senotsü aika angutsüsa mapang ka ajurudir, idangjibo Yisu ta tetshia kodanga sarasadema mesüdang amai tenük amur rongsenjiang asen taküm nung kibur kümdaktsüba purtemji asenok asütsü. Aji oda, alima yimten aser rongsen nem asen taküm meyokdaktsür joko Tsüngremia asen takümbo tanaben magizüktsü amai asenoki bilema alitsüa akok. Ibayongji, tai menayonga taidok nangzüka Tsüngrem anasai aotsü melen asenoki asenoksasa Tsüngrem nungi talangba-talangba pilaa oadoker. Asenok asoshi asenoki Tsüngrem anema tai menabaji masü saka tai menaba ajanga asenok Tsüngrem nungi talangba-talangba pilaa aobajiang lendong tuluba lir. Atangji, Peteri Yisuji pa kibur aser kümtetdakba ta tangar tsüngdang menangzük. Pa asoshi aji Yisu Khrista tsüngdang aibelenba mapa tuluka liasü.Ajisüaka, Peter dak tajung kaji pai kodang pa kümzüksang Yisu Khrista anema aibelenba rajema aru, pai telok nungi pilaa orr kanga kukua jepa taidok nangzük. Ibaji ngua Yisu Khristai pa dang taochi tulu sayu aser pa dang taidok agütsüba dang masü saka Yisu Khrista shia aruba metettsüsa Peter nem maongka balaka agütsü aser Yisu Khristai paji balaka aniener tenangzükba takang ka agidaktsüba Yohan 21 nung shia angutsü. Aji oda, Yisu Khrista pa kibur aser kümtetdakba ta menangzüksang Peter toang Yisu Khrista kuliser tongti ka kümer külen pa ajanga kenübo nisung meyirijang asem temulung meyipdaktsüba Tenyartem tapu nung angutsü. Ibaji dang masü saka pa ajanga tasür shia arudaktsütsüsa pa nem ain tashi agütsü. Iba amaji, Tsüngrem taginübajibo na kong lir yang nung jagi anir arua Pa mulungba mapa nung na amshiner. Kodang Pa nütsüngtem kilong nung shibanger joko kecha meinyaktettsü ta bilema tetsübu nung tia nung liasü, idangji Yisui parnok dang nenok den yimjung liang ta dang ashi. Tanü asenok Tsüngrem tsüngdang aibelener pelaa linüaka melitetba aser yimjung nung linüaka melitetba purtem aika alitsüa akok, ajisüaka asenoki dang Peter amaji asen aibelenba mapatem atema kukua jepa taidok nangzükra, Tsüngrem nungi tanabena aser tasembena taochi angutsü. Iba taochiji asenok assoshi peria dang lir.