Tanabuba Ao Oshi Metet Tendangba (Takoker nem senpet sen 10,000 agütsütsü)

– S. T. Yapang. Lkr. Kohima

Asen Ao oshi koda tongtibang aser terajem, item indang lanur nem tali metetdaktsütsü asoshi Ao oshi nung tetoktepba tan agi tanabenbuba ayongzüker, tejangrartemi tsünglanglen agütsüa aliba ya jungjunga züngdanger Aor oshioben nung mongin jenti alinungji parnok nungi shisa agia langzüangma;
1. ASLB ajanga adokba Tensenyim-1 nung benbenbenbena ta shia lir, ben pezüben lepshia lir, kasa yamala olong ana mesüra asem, pezüben lepshiba iba ya medeni olong pezü shiang, aser aji kong amshir oren dena peta shiang.
2. Tekolok tendangba- Tasüngdangba ka nisung ana dang yamai asüngdang “Apple aser meimchir, aji tatsü agi rasa shiang” Iba telangzüba nung tenüng mezülu, shiti kasa dang, pen kasa agi zülu. Tenaprongla ya asen Naga nunger, ka Doctor ka Engineer, tena rongnung kati “Apple ajanga meimchir nem tajangzük agütsür anungji apple ya chiang” ano ka jaki “Apple ya meimchiri jangratema achir, saka ibaji masüdang tetsünürbo kanga timtema tsünür ang achir asünungji apple achidang ibajia bilemtettsüla” ta zülu, tena rongnung kobala Doctor aser kobala Engineer?
3. Ao lima nung meimchiri achitsü akokba arem süngjang ka lir, kobai tsüngküm mongpu melemdangi adanger ibaji shiang? (Ameta/mamazü magitsü, kechiyong ya asen lima nung poktetba süngjanglijang masü aser lozüa magitsü, kechiyong ya küm nung khen dang adanger).
4. Ao lima nung süngjang ka lir, koba tadangba süngjang ajak tereprangtsü balala adanger (kata mesüktepa madanger) ibaji shiang?
5. Ao lima nung aliba shiruru, ozüsangnu mesüra tzü shiruru ka tenüng zülujang semer (30) lir, ibaji shiang (Yim ka kija osü asüyonga agitsü, saka yimer rongnung asüngdangdong/kenshioshiri iba kuliji agütsütettsüla, pa/la opung züngya dena agütsütsüla).
6. Ao oshi nung oren ka tembanga züluyonga shiba indang ashirar memtetba olong ka lir, ibaji kechi olong? Oren ka shiang?
7. Asen Ao oshi nung tejaklen aser tesülen nungi kasa adoktetba Anatsüoyim (palindrome) aika lir, tatishitsü tangar oshi nung MALAYALAM, iba amala tsünglanglen agütsüa aliba ya langzüang (nüngjakoja magitsü, yim ka kija osüa magitsü), nai koba langzür iba olongji kong koma amshir ibaji dena langzütsüla. Olong ka agi kasa aika adokaka ibaji ka dang azüngtsü Tat. ANA nung lir, chibo ANA, ajakji ka dang azüngtsü, saka item ajakji rasa ashitsüla:
(a) Anatsüoyim zülujang tuku (9 letters) olong pezü (4 words) shiang.
(b) Anatsüoyim zülujang tenet agi akümba olong terana shiang.
(c) Anatsüoyim zülujang trok agi akümba olong pezü shiang.
8. Kechiba tzünglu ya anünglen nungi alur/tsüker sürnung ‘tzünglu alur’ mesüra ‘tzünglu tsüker’ ta masü ‘tzünglu arur’ ta jembir? Iba o abensatsü asoshi khuli tejangja agüjang.
Temetettsü:
1. Iba senpet ya shibai mezüng ajak shitak langzütetdir pa/la nem dang agütsütsü.
2. Telangzüba ya Rongchii (April) 15, 2018 tashi nung langzütsüla. Ibaji aoanr2017@gmail.com mopungshiti (email) ajanga yokba dang agitsü.
3. Telangzüba ya ASLB ajanga adokba Tensemyim-1 2017 küm adokshiba nung ajemdaker obendangtsü. Talila kaji tang amshiba nung enok/endok ta lir, saka iba meyipo arudang meinok/meindok ta amshir asünungji iba tetendangba nung inok/indok ta asüba ren nung o bendangtsü.
4. Iba tetoktepba nung küm telemsa mali, kaketshirtem dang masü Aor kenshioshir, Arangtet ajangteter alir aser Ao tesayurtemia shilem agitsü akok.
5. Iba senpet sen den kulikaket ya Aor Oshioben Aser Nüngjakoja Ratet (AOANR) ngutepkaket tapak (facebook page) ajanga agütsütsü.
6. Tasüngdangba züngya 5 dak alaka telangzüba ajak yim ka kija osü/oshi magitsü.
7. Telangzüba ya nisung ka kijai dang masü telok mesüra kaketriju ka tenüng nung asüyonga langzütsü akok.
8. Merajemba/ mangatetba lira 9612800973/9856714829 nung aonung 8 ako nungi 8:30 tashi nung AOANR ketdangsür den tongteprateptsü akok.