Tanbo Class 12-pass PM ka meshimtsüla: Arvind Kejriwal

New Delhi, February 14 (Agencies): Ato kilonser, Narendra Modi aija AAP tongti aser Delhi Chief Minister, Arvind Kejriwal-i voters dang, taruba Lok Sabha election nungbo linük nung temaba menden atema Class 12 pass pur ka meshimtsüla, ta ashi.
Bodhbarnü Jantar Mantar, New Delhi nung opposition party tem lokti senden ka nung jembidang Kejriwal-i, nüburtemi Class 12-pass pur ka linük nung Ato kilonser kümdaktsü, ajisüaka 2019 küm nungbo kasa aibelenji meinyaktsüla, ta ashi.
Paisa, Ato kilonseri Rafale fighter jet deal nung ochimashi inyakogo, ta aitsü.
Modi indang educational qualification dak sendakba nung Kejriwal-i, “Taoba mapang nenoki Class 12-pass pur ka linük Ato kilonser kümdaktsü. Tanbo kasa aibelenji masütsüla saka tazünger ka shimtsüla, kechiyong Class 12 pass kati pai kong sign asür’ar memetet,” ta ashi.
Kasa senden nung Mamata Banerjee, Sharad Pawar aser Chandrababu Naidu nunger dena opposition lenir aika aden.
“2011 küm Jantar Mantar nung ochimashi anema lokti senden agiba ajanga taoba sorkar (Congress-i aniba UPA) agienba ama iba sentong ya ajanga Modi sorkar agientsü,” ta pai ashi.
Modi sorkari jenjang tur Rafale fighter jets alizük, ta shia pai, jenjang atubaji Ato kilonser ajanga lir, ta aitsü.
“Narendra Modi-i Rafale company den jembia liasü,” ta shia pai Defence Ministry file nungi paper ka ayipshia sayu.
Paisa, Rafale deal indang jungkai adokra Ato kilonseri pa menden nungi anentsüsa akumtsü, ta ashi.
CBI ketdangsertemi Kolkata Police Commissioner dang asüngdangyatsü merangba onük nung takok anguba atema Kejriwal-i la nem tenüngsang agutsü. Kejriwal-i, iba ya Modi-i West Bengal nung shimba sorkar ka anema inyakba lir, ta ashi.
“West Bengal sorkar ya nüburi shimba sorkar lir. Iba nungji Ato kilonser temeden mali. Commissioner apu asübo linüki state sorkar masü saka Modi sorkar tsübutsüla, ta angatetla,” ta paisa ashi.