Tanelaji Teremsep – 1 Tesa. 5:19

Alima nung Tsüngrem mapa matalokdaktsütsü asenoki nokdaktsü makok saka asenoki Pa tanela asenok taküm nung remseptsü akok. Asen taküm nung Tanela Temeshi mapa inyaktsü Tsüngremi asenok nem nüji agütsü. Kodang tanelai ashiba tashi mangalir, mesükshi-i yutsüdir, mesüra sentokdir asenoki asen taküm nung pa remsemdaktsür. Isaia ainkari iba nungi adokba rasaa ashir: “Aser Pai ashi, oang aser iba nübur dang shiang, atangji nenoki angashir saka mangatetter, nenoki atangji angur saka memeteter” (Isaia 6:9; Mathi 13:14-15).
Kodang nai temenen menadir, Tanela Temeshi-i nü dang temulung meyiptsü ashir. Nai ashi mangai toktsüra aser temulung memeyipra Tsüngrem O nung ne mulung meranga akümtsü. Tsüngremi ne taküm asoshi mulunga aliba jembira aser nai aji songtemra, ne taküm nung Tanelai-i mejembitsü mapang ka arutsü. Tanelai jembiba nai maneni sentokra Tsüngrem nungi joko nai kecha O mangashitsü. Nai maneni Tsüngrem O nung tekong merangra, Pai ne nem O tasen kecha magütsütsü. Ne taküm nung Tanela Temeshi ola menokdangtsü kümdangang. Pa tanelai-i ashiba ajak nungbo na sünepba malitsü saka Pa O-i na talubusa taküm dangi anitsü.