Tanep 5:00 ako nungi NH 2 mokdanger

Tzüdikong, August 10 (TYO) : Nagaland Pulp & Paper Company Ltd (NPPC Co.Ltd), Tzüdikong nung inyakertem nem ita sen dena magütsüteti akümba ajanga yangji inyakertemi tejashi marem August 11, 2017 anepdang 5:00 ako nungi mapang telatet ka makai, parnoki akangba onüktem mataloktsü tashi National Highway 2, Amguri-Mokokchung lenmang nung gari kata mesenzüdaktsüi nokdangtsü ta parnoki nenshia metetdaktsüogo.
Iba osang ya parnoki tamalen sangdonga alinungji, tanü Brehostibarnü Nagaland Chief Secretary nungi yokba shidi ka bener Tuli ADC-i anir District nung government ketdangsertemi NPPC Co.Ltd nung inyakertem telongjem ajurua lenmang mokdangba sentongji agientsü mepishia liasü saka government nungi parnok mulungsüa telangzüba magütsü nungji, mokdangba sentongji agitsü ta parnokisa metetdaktsü.
NPPC Co.Ltd. Workers’ Union dangi Chief Secretary-i züluba shidi nung shia alibaji, Nagaland state government-i June 28, 2017 anogo nung Ministry of Heavy Industries, Govt. of India dang (NPPC) Tuli paper mill tanaben shia arua lapoktsü nüngdakba aser inyakertem nem ita sen magütsüba ajanga timtem ajuruba indang metetdakja züluba indang liasü. Ajisüaka, Govt of India nungi telangzüba arubabo Nagaland government-i mesayutet.