Taneptsü mesüra Manep : (2 Korint 12:1-10)

“Kü taochi na asoshi teperi, kechiaser Kü ain mekokmin nung abensadaktsür.” (2 Kor. 12:9).
Tsüngremji taneptsür. Pai  Pasasa Jehova-Rapha, tetezü “Kibuba shibai aneptsür” ta jungkai adok (Anitet 15:26). Pa kodanga memelenshir. Pa ain teti kasa lir. Nisung aser mozü asoshi kechi tamakoktsü lir, Tsüngrem denbo takoktsü lir.
Tsüngremer taneptsü ain tematiba Yisu alima nung alidang Pa mapa nung jungkai adok. Yisui tashidak tapu balala ajak aneptsür aser shirnokisa Pa dak kongshias aneptsü. “Yisu Khrista yashi, tanü aser teti kasa dang lir” (Ibri 13:8). Kangki nung Pai asenok menen aser tashidak aben (Isa. 53:4,5; Mt. 8:16,17). Pa zü agi asenok mesüka lir, aser Pa zübu agi asenok aneba lir.
Tanela Temeshi arogo nem tanebtsü sempettem agütsü (1 Kor. 12:9,28). Item jagi mapa inyaker saka asenok temang tasütsüba taküm. Asenok tasüba kübok lir (1 Kor. 15:26). Asenok temang ajunga kümzüktsübaji tarutsü nung lir (Rom 8:23). Shirangba aser tejashi joko malitsüba anogo matong tashi asenok temang nung shilu manem aser shisashiko odang alitsü (J. Adok 21:4).
Kodang Khristan ka shirangdir, asenoki sarasadem nung yaritsüla. Arogo nung tamburtemi tamang sarasadem agütsüdaktsütsü asoshi parnok teyari bushitsüla. Aser pai/lai temenen bushitsüla. Kodangsa mozü teyari nüngdaker aji bushitsüla. Yimya jenjang nung asenok anebtsü (Yakob 5:14-16).
Saka Tsüngremi maneptsütsüba mapang ka lir. Tsüngrem den shidak jajar saka Tsüngremi maneptsüba Laishiba nung angur. Paul temang nung ayi odang liasü. Tsüngremi Pa taochi teperi ta nangzük (2 Kor. 12:7-10). Timoti tebok tashidak keta liasü (1 Tim. 5:23). Epaphroda shiranga asü (Phil. 2:25-27). Ainkar Elisha, shibai sayatenya mapa aika inyak, tashidak agi asü (2 Chuba 13:14). Otsü nung temeshi nisung aika tanebtsü manguba angur. Fanny Crosby (1823-1915), America nunger ken mejemer ka, la  ita terok alidang tenük apok aser tasü nü tashi tenük poker ali, saka lai asenok nem ken 8000 dak tali agütsü. Item rong nung kaji “Tejangja otsü, ya kü meyong” ibai lir.
Sempet tajung ajak Tsüngrem nungi lir. Shirangji Pa nungi masü, saka Pai ibai asenok tazüokba ajok ka ama amshir, miim mapa kar asoshi amshir. Pa tematiba. Tsüngrem meimertem asoshi mapa ajak tajung asoshi inyaker (Rom 8:28).
Anepang mesüra taneb, Tsüngremji Tsüngrem lir! Asenok tejashi nung Pa taochi teperi lir.