Taneptsü tenzükdak, Eden mozükidang aneptsütsü tenzüker

Dimapur, May 07 (TYO): Dimapur nung mozü ki aika lir saka ano tashidak tulu agi shirangertem taneptsü angudak tesem tajung ka asütsüsa Eden Medical Center ka tenzükogo.
Iba mozüki ya Dimapur nung Sub-Jail anasa Kashiram yimdak amenoka lir. Ajak asoshi osang tajung kaji iba mozü kidang tanga tashidaktem anepaluba dak alaka cancer tashidak anepalur, anungji tangbo cancer agi shirangertem mozü agitsü asoshi tangaleni aotsü menüngdaker.
Iba mozüki lapoksang tebu tedi Wb. Yashitsüngba-i iba osangbener den jembidang ashiba agi, Naga nunger aika cancer agi shiranger aser parnok asen lima nung anepaludak makaba agi tangalen senotsü aika endoka timtema senzüba ngua iba mozü ki ya lapok. Iba mozü kidang cancer tashidak anepalutsü asoshi aliba machine ka jenjang sen crore 5 agi aliba oset amenoka lir. Iba oset ya UK nungi alia bener aru ta pai ashi.
“Cancer tashidak agi shiranger ajakbo takar masü, anungji sensakertembo pei kimong-lumong yoka tangaleni taneptsü bushia aobaji temeimtsüka aser temulung shia repranga liasü,” ta Wb. Yashitsüngba Aier-isa ashi.
“India nung cancer anepaludak Mumbai aser Vellore ama nung Naga nunger aika tsümartem ket nung ashiokdaktsüba osanga lir, item osangji angashidang kanga meima ait,” ta paisa ashi.
” Kanga sensakertembo onoki angati yaritsüa mulunga lir, asenoki sensakertem meimtsüla, yimten yimsüsürtemia sensakertem meima anepalutsüla,” ta paisa metetdaktsü.
Eden Medical Center nung ya tang nungi amang-sangwa metitemi manemshilur aser yiruyipongertem anepalutsü purtem alitsü aser  anogo shia shirangertem anepdang 9:00 ako nungi nikongdang 5:00 ako tashi reprangtsü. Iba mozü kidang monga anepaludaktsütsü purtem atema suite room 6, cabin 35, tetsürtem ward ana  aser teburtem asoshi ward ana ta lir.
Iba mozükidang radiology department nung 16 slice CT scan aser digital X-ray machine den 3-D ultra sound machine amenoka lir.
Item dakji alaka poknüngpokra tashidak reprangba, tetsürtem tashidak anepaluba, tebu doctor aser azü tendangba doctortem den  tanü asüng adokba machine tajung amenoka lir.
Iba osangbernisa Eden Medical Center kibur, Wb.Yashitsüngba dang taküm nung mozü ki tululu ana tashi lapoktetba jagi temulung sür masü ta metetnüa asüngdang dang, ” ni tebilemba tongogo, temulung kanga süogo, tangbo Naga nungertem aika senotsü aika meindoki ana nung pei kidang nungi mesüra  adianu aser kinunger kidang anenzüka taneptsü angutsü imlar,” ta langzü.
Iba telangzüba jagi pa dang masü Naga nunger ajak temulung asütsü südi. Wb.Yashitsüngba Aierisa Dimapur nung Zion Hospital lapoka lir.
Naga nunger takartem rongnung Zion Hospital aser Eden Medical Center lapoktsüba nisungi inyakba ama nübortem asoshi pei akaba agi inyaka toktsüba mapa tang tashibo shingaia inyaka mali. Ibai tanü Naga nunger takartem, yimsüsürtem aser talisa lanurtem asoshi tatishitsü aser tayongzükba tuluka asütsü.
Iba mozüki phone number 03862-248288 aser email address: emcdimapur@gmail.com alitsü.