“Tang (Anatg) Nagaland tesayurtem tia”. ‘Government dang ya shiner’

– Temjenwapang Jamir, Akhoya.

Alima tejakleni aoba den liromedema tanü asen Naga lima schooltem nunga kodang reprangdangtir, akhi putu nung ama masü saka tanü tesayurtem-ji tazüngba aser temetetba tulu agi sünga aliba lanur tesayurtem agi sünga kümogo. Pei tazüngba den külemi kaketshirtem dang tajungtiba nung sayutsü mechi küm ana-asem agia training balala agir inyaker teimba lir. Alima nung tesayur mapa-yasa, tematiba aser akhüm-ket mapa ka lir. Jangratemtsü aketba denji külemi iba mapa-yasa tasaktiba aser aser tekümdangtsü aketba mapa ka lir. Tanga limatem nungbo Government-i tesayurtem ya kanga dang akhümtsübua amshir aser parnok nüngdakba ajak agüja pelashishia kaketshirtem dang sayudaktsür, aser ibaji ajanga parnok lima tejakleni aoer. Atangji, “Alima ka yanglutsü aser tejakleni aotsü asoshi tesayur dak tuluka keta lir” ta parnok govt-i bo junga meteta lir.
Süra tanü asen Naga lima nunga Chief Minister-i anir minister, MLA tem aser temaba govt. menden nung amenertemjia tanü na iba mendenji tongtettsü-sa nü taküm jenjang shibai yanglutsü?? Süra Nü taküm jenjang yanglutsür dang meima benshitar ma?? Aser Parnok dang ochi mashi mapa meinyaktarma? Item ajak dang alaka tongtipangsa yangi, tanü nür chirnurtem Na ama jenjang tajung tongtetaktsütsü-sa aser azükaroa litaktsütsü asoshi tanü nai parnok tesayurtem junga anepalua pelashishia saydaktsütettar ma?? Aji mesüra asüng asen Naga Limai “AYATAI”. Aser Ibaji Shiba Tai asütsü???
‘NÜBURTEM DANG TAYONGZÜKBA’
Nagaland nung govt. tesayur mapa küm terok (6) nungi ter (10) tema fixed pay (Rs.6600/8400) agia alir telok ka lir ibaji ANATG 2015 ta ajar. Mapang talangka iba taa (Pay) agia arur, saka Govt.i onok service regularise asoshi kecha mapa inyakba mangu nung iba telok ya tentet.
Mezüng mapa nung appoint asüdang govt.i directive ka agütsübaji shirnok teacher’s training magir ali mapa nung joined sür küm asem tsüngta nung training agitsüla ta asünung tesayur ajak iba training ji agiogo. Iba telok (ANATG) ajanga mapang talangka govt. den service regularize asoshi jembia arur külen, taoba küm April ita nung service regularise sütsütsü atema suitability test agir külen mapang tatsüka tsüngda nung ano documents verification agi. Anungji teimla tulu nung regularise asütsü yongya liasü saka govt.-i tanü tashi onok nem regularise mesütsü. Asenok Nagaland nungya kodang reprangdangtir, koba lokti südir süaka govt.i tanemi mepishia asüngdangba mangaba agi lokti ajaki longka (agitation) aiteper; aser asangsa nung yamaji longka aitba ajanga dang govt.i telangzübasa agütsür. Saka iba ama longka aitba mapang asen nübur dang takoksa tulu ajurur. Anungji yamaji masütsü mechi onok Association-i aiben meeting lia jembiteper, onok jashiaka kaketshirtem takoksa majurutaktsütsü mechi tesayur ka ama tangatetba yimya nung kaketshirtem meima bilemba agi mapang talanga agia govt.den tajungtiba nung yimjung nung govt. ka dang ama akhümtsübu aguja onok temeten asoshi aremzüka mapang talangka ataa aruogo, saka govt.i onok tangatetba asoshi pelaa onok nem onok temeden (service regularise) agütsütsü melena excuse balala yanglua onok mapa senzüka toktsür, anungji joko kaketshirtem meimakasa tangbo onoki maremzüktetti joko phase wise agitation aotsü tenzükogo… aser tekuratiba nung onok nem onok temeten service regularise mesütsüra onoki agitation maneni tesashiba agia aotsü aser iba mapang timtem kar tanga adokra ibaji onok khuret masütsü. Bilemdangra onoki mapang talangka angati tenzüker amai dang tenzüka fixed pay RS.6600/8400 agia küm 10 tema govt. tenzüka aruogo: süra ! kechiba govt.i tang tashi onok nem regularise magütsür??? Onoki yakta agitation maoba agi asü?? mesüra ano fixed pay ji dang chia tenzükdaktsüner asü??
Tesayur teimbaka iba fixed pay dak dang metaloker alir, kechiaser tesayur kaji tanga nungi income angutsüji kecha lenmang mali aser iba pay yagibo kibong memesütetter. Süra yamaji okronga pei kibong khuret den kaketshirtem dang pelashishia aser jangratema sayutettima?
School-tem ajak nung onok ya tanütsür-tanubur tem lir anungji subjects teimba ka onoki agir, oli oratsü aser school maparen ajak onoki dang inyaktsüsa akümer süra kechiba mapa yari tajangzük magütsür? Onoki kaketshirtem meimba ama kechiba govt.i onok memeimer??
Yamaji tanü asen Nagaland nung, asüng asen chir tia yanglurtem iba Tia nung okronga alidang Oh! arung nebur ajaki asüng asen lima yanglutsür tem asoshi Ola adoka nokdakti ! ta ayongzüker.