Tang mapang ya ajak longjema alitsü mapang: Kejriwal

New Delhi, October 07 (Agencies): Delhi Chief Minister, Arvind Kejriwal-i tawa army temi PoK nung kiralongrartem amakba kuli agüjang ta akhangba atema pai aitsüba mapang ka nung tanü pai, surgical strikes ya yimtenren ken o ka mekümdaktsütsüla; tang mapang ya ajak longjema alitsü mapang, ta ashi.
Congress lenir Rahul Gandhi-i ‘khoon ki dalali’ ta jembiba aija Kejriwal-i, “Asen sepaitem indang Rahul Gandhi-i jembiba oji ni sashia aitsür, iba onük nung ajak longjema alitsüla,” ta ashi.
“Asenoki mangatettep onük ajak amadoker army nungittsüla, aser linük nübur ajaki Ato kilonser nungittsüla, iba onük nung yimtenren maitdaktsütsüla,” ta paisa ashi.
Army temi kiralongrartem amaktsü atema Ato kilonseri mera agiba atema tamalen Kejriwal-i pa nem tenüngsang agüja liasü. Ajisüaka October 3 nü pai Centre dang army temi kiralongrartem amakba kuli agüjang, ta akhangba ajanga aikati pai aitsü.
“Anogo ana tejaklen United Nations-i sangdong ka ajanga arrtsülen item ama tatalokba maliasü ta shiogo. Item osang ajanga ni azü roseper. Pakistan-i  International sabang nung India maksütsür,” ta pai jembia liasü.
“Ni Ato kilonser dang pa aser Army temi Pakistan dang tansütsü lesson sayubaji jungkai adokjang ta akhanger,” ta pai jembia liasü.