Tang mezüng All Nagaland Teacher Educators senden kaogo

Kohima, Monupii/May 10 (TYO): Tang mezüngsüa All Nagaland Teacher Educators senden Monupii/May 10, 2018 nü SIEMAT Conference Hall, SCERT Kohima nung tenzüka kaogo, aser senden tetenzük sentong nung o jembitsü atema tejaokerji IPR, SCERT & Village Guards Adviser, Toshi Wungtong liasü.
“Changing Perspectives & Approaches in Teacher Education” omen nung ayongzükba All Nagaland Teacher Educators senden nung jembidang Adviser, Toshi Wungtong-i, “Alima nung tongtibangtiba nisungtemji nenok lir, nenok ya mezüngbuba jenjang nung lir, alima tesem ajaklen nenok akhümtsübur. Shisatsü aser tazüokba nung alitsüji nenoki sayuteter,” ta ashi.
Pai ashiba agi, teacher educators temji ‘scientists’ lir aser ibaji rocket science nungi laboratories tashi asütsü; science ya lenla ajak adenba onük ka lir.
“Nenoki ochi aser atangji bushira, na-a scientist ka lir. Loktii ochi nüngdaker, aser ibaji asenok ajak asoshi lir. Shisatsü tetezü shidakbaji ‘Ochi science’ lir. Loktii jaklaliro nung tamang akar, loktiliba nung ner kibong dak rangloker,” ta paisa metetdaktsü.
“Nisung ka melungsentsü nung angazüknüba shisatsü alitsüla, iba denji külemi shisadangba den tasüngdangba melungsentsü alitsüla. Educator temji temelenshi adokdaktsürtem asütsüla aser mongin asütsüla,” ta Advisor-isa ashi.
“Kechi mapa nung ajemoka lidir liaka asenok ya lokti nung lungro lir, nenoki nübo tajungtem adokdaktsütsüla. Kodang nai ki ka südir nai lungro tajungtiba shimmer, anungji loktii nenok nem lungro tajungtiba adokdaktsüner,” ta paisa shisem.
Khristantemi Arogo adener-a ayimjema inyaktsüla, ta shia pai teacher educators dang, “Nenoki sayuba reju nung nenok mongintem akumtsüla. Nü teinyaktsü khuretji nü itasen dang nungi tuluba. Naji kisür ka, tesayur ka lir. Loktii aginüba ama lokti tajungtiba nung yangertsüpur tongtibang nisungtemji nenok lir,” ta paisa metetdaktsü.
Kasa senden nung NCTE nung taoba Chairperson, Prof. M.A. Siddiqui-i, chairman ka ama pai linük tesem aika sema senzükogo saka Nagaland mesemdangi liasü, anungji SCERT Director-i jaokba atema pelar, ta metetdaktsü.
Pai ashiba agi, shisaliok teimlaji teacher educators lir aser tesayurtem tajungtiba nung sayutettsüji nenok khuret lir.
“Akhidangbo orientation training magiyonga tesayurtemi sayutettsü ta bilema liasü,” ta pai ashi.
Paisa, shisaliok tajungji teacher educators tapubang nung lir, aser ibaji tesayurtem nem agutsür, ta ashi.
Principal Secretary, School Education & SCERT, Menukhol John-i lokti pelaa agizükba o jembi aser Director SCERT, T. Sekhose-i senden okila metetdakja liasü.
Iba senden ya Additional Director SCERT, Kezhalenuo Kesiezie leniba nung agi aser Joint Director SCERT, Moatemjen-i tepela anküp o jembia liasü.