Tang mezüng Dibrugarh-Guwahati tsüngda Shatabdi train senzütsü

Guwahati, April 30 (Agencies): Deobarnü Assam nung tang mezüng Shatabdi Express train ka Minister of State for Railways, Rajen Gohain-i Dibrugarh nungi tenzüktsü; iba train, Shatabdi Express (No 12085/12086) ya Dibrugarh aser Guwahati yimti na tsüngda senzütsü.
“Mapang talangka nungi nüngdakba, Guwahati nungi Dibrugarh aser Dibrugarh nungi Guwahati tashi senzütsü atema Shatabdi Express tenzükba ajanga nüburtem takhangba ataloktsüogo,” ta iba sentong nung Gohain-i ashi.
Linük indang Indian Railways nung train tekara rongnung Rajdhani aser Duronto trains den Shatabdi Express train densema lir, koba ajanga yimti tulutem o tourism yimtitem na sendakteptsü.
“Iba train nung tang tasentiba, air-conditioned LHB Coaches alitsü koba ajanga anisüngzük tulu agütsütsü. Ainlen senzürtem nem mapang apir tzü pongdang, juice, coffee mesüra süngo den chiyungtsü agütsütsü,” ta minister-i ashi.
Paisa tesem nung alirtem dang railway indang osettsüset aser kiojen apayua amshitsüla aser pei meyong ama bilemtsüla, ta metetdaktsü.
Ato kilonser, Narendra Modi-i Northeast tesem terenlok atema kanga nendaka inyaker, ta shia minister-i, Railways-i maneni Northeast tesem nung terenlok atema inyaktsü, ta shisem.
Iba train nung AC Chair Car coach 10 aser luggage-cum-generator car ana alitsü aser yimti ana tsüngda train tenetben anentsü.
Guwahati nungi Dibrugarh tashi senzüba train para nungji chiyungtsü densema lir, aser tain passenger shia sen 1,095 asütsü.