Tang mezüng IAF nung tetsür fighter pilots anioktsü

New Delhi, June 10 (Agencies): Tang mezüng Indian Air Force (IAF) nung tetsür fighter pilots atema cadets asem anioktsü.
Tetsür pilot asemji mezüngbubaren training takok ngua tembangba sülen June 18, 2016 nü IAF fighter stream nung anioktsü, ta ketdangsertemi metetdaktsü.
“Graduation parade ji IAF puti otsü nung alizüng ka asütsü, kechiyong flying branch, fighter stream nung tang mezüng tetsür pilot asem anioktsü,” ta IAF sangdong ka ajanga metetdaktsü.
Iba sentong nung Union Defence Minister, Manohar Parrikar-a adentsü.
Iba sülen parnok küm ka piyong advanced training agitsü aser 2017 küm June ita tashi nungbo ‘fighter cockpit’ nung anioktsü.
Training agir fighter stream nung temsüa alir tetsürtemji- Bhawana Kanth, Mohana Singh aser Avani Chaturvedi nunger lir.
Taküm June ita nung par asemprong Karnataka, Bidar-i oa küm ka piyong Hawk advanced jet trainers nung stage-III training agitsü, iba sülen ang parnoki raraba tayimtsü ayimtsü.
IAF-i fighter pilots nung tetsürtem anioktsü atema benokba sülen yaküm October ita nung sorkari ibaji agizük, iba sülen fighter pilots akümtsü atema tetsür cadet troki toktepa liasü, ajisüaka fighter stream atema par trok rongnung tetsür asem dang shim.