Tang Naga nunger nüngdakbaji telongjem : Nuklutoshi

Kohima, November 14 (TY) : Naga yimten tebilemtsü teti atema tatembang kati arua latettsü asoshi India-i kanga temulung agüja inyakba angur, anungji ibai Naga nunger asoshi maongka ta angateta asenok ajak longjemer ochi mulung agi telemtetba agitettsüsa inyaktsüla ta National Highways, Mechanical & Election Kilonser Wb. Nuklutoshi-i metetdaktsü.
Pai iba o ya Honibar nü Langpangkong Senso Telongjem Kohima pur lokti senden nung jembidang metetdaktsü.
“Tang ama Naga yimden ken o latettsü India-i maongka ka agütsüdang asenoki züzüa toktsüra mesüra kati ka anemtepa amungdang iba maongka süidaktsüra küm noklang tema nunga ibaji lepa bener marutettsüa akok, anungji tang ya asenok ajak longjemer inyaktsüba mapang lir,” ta paisa yimten khuret ka lemsatep.
Iba kasa senden nung, Horticulture Director, Wt. Watienla Jamir-ia tepela aser tajungshi o ka jembidang, “akhidang asen tsüraburtem mapangbo telongjem nung party politics maitdaktsüi alima aser nübortem meima inyak, iba jagi terenlok mapa aika takok ngua inyaktet,” ta metetdaktsü.
” Tamalen asen lenirtemi paper mill bener arua toktsüba tanübo lemtar lir, ajisüaka tang ya talsa asen kin tia aka ta pelaa bilemer, kechiyong tang iba Paper Mill shia arudaktsütsüsa asen kin nungisa Wb. Amenba Yaden, Parliamentary Secretary Industries & Commerce lir, Wb. Imkonglemba IAS Commissioner & Secretary aser Nagalima Yimdenren nung Kilonser tazüngpur rongnung Wb. Nuklutoshi lir asünungji, asenok ajak longjemer dang inyakerbo iba paper mill asentenshia arutettsü ta temulung lema bilemer,” ta laisa ashi.
Kasa senden nungsa tebu tedi, Wb. S. Yarenia tajungshi o jembia liasü.
Iba lokti senden nungsa taruba kümsük 2016-2018 küm LSTK lenitsü asoshi ketdangpur itemi shim: Tir- Temjenyapang Jamir (Akhoya), Tatong Tir- N. Ajungba Ozüküm (Mongsenyimti), Tongti Zülur- P. Yapang Jamir (Changtongya), Repsem Zülur- S. Lepzüng Pongen (Salulamang), Senotsü Zülur- Mayangtoba Imsong (Longkong), Senotsü Zülur Yariba- Lima Jamir (Wamaken) aser Kimen P. Talitemjen Jamir (Akhoya).