Tang tamshidak Rs. 500, Rs. 1,000 amshiba anener; Dec. 30 tashi nung melentsüla

New Delhi, November 08 (Agencies): Mongolbar aonung Ato kilonser, Narendra Modi-i, tang amshia aliba Sen 500 aser Sen 1000 note tem November 9 nungibo jenjang kecha malitsü,” ta linük nem metetdaktsüogo.
Modi-isa, iba telemtetba ya sen taila, black money, ochimashi aser linük rongsenkettsüng anema kiralongraba nokdangtsü atema lir, ta metetdaktsü.
Rs 500 aser Rs 1000 notes legal tender anenbaji Mongolbar-Bodhbar tadentep ayaterm (November 9) nungi asütsü aser November 9 nü ATMs mapa meinyaktsü aser tesem kar nungbo November 10 nüa ATMs mapa meinyaktsü.
Paisa, November 11 tashi anogo shia sen 2000 tashi dang agizüktsü akok, iba sülen tanemtanemi timbatimba agizüktettsü, ta metetdaktsü.
“Black money anema mera takang agitsüla. Tang nungi Rs. 500 aser Rs. 1000 notes mamshitsü. Ibaji bank aser post office nung melentsü atema anogo 50 lir,” ta pai metetdaktsü.
Pai ashiba agi, Rs 500 aser Rs 1000 notes ji November 10 nung December 30 (anogo 50) tashi nung taa kecha magütsüi post offices aser banks nung agütsütsü akok. Shirnoki kuli balala ajanga December 30 tashi nung Rs. 1000, Rs. 500 notes ji memelentetdir parnoki 2017 March 31 nü tashi nung ID proof agüja melentsü akok. Ano Bank tema November 9 nü shibangtsü.
Modi-i, “Nü senji nü meyong. Nai takoksa kecha mangutsü. Sorkari iba atemaji inyaktsü. Linük atema asenoki iba nungi timtem liaka aremzüktsüla, kechiyong iba nükjidong ya ochimashi, black money, sen taila aser kiralongra anema lir. Iba linük nung ochimashi aser black money tera yanga lir,” ta metetdaktsü.
Modi-isa, iba telemtetba ajanga medical payments mesüra tanga tongtibang services mekongshitsü atema mera agiogo. Hospitals, petrol pumps, railway reservation counters, airports, crematoriums aser tongtibang services temi taruba ghonda 72 (November 11) tashi item sen agizüktsü, ta metetdaktsü.
Modi-i Union Cabinet senden ka ayonga amenba sülen iba sangdong agütsüogo.
Rs. 500 aser Rs. 2,000 notes tasen yanglutsü atema benokba Reserve Bank of India (RBI)-i agizükogo aser kobi melii sen tasenji amshitsü.