Tang tasen tentetba BJP Kohima District senden amen

Kohima, February 06 (TYO): Tang tasen tentetba BJP Kohima District mezüngbuba senden February 6, 2019 nü State BJP office, opposite Head Post Office, Kohima nung menogo, ta tanü General Secretary, BJP Kohima District, Nelson Semy-i sangdong ka ajanga metetdaktsü.
Iba sentong nung jembidang BJP Nagaland State Unit General Secretary, P Kavili Achumi-i district BJP lenirtem dang yimtenren nung tejangraba agi nüburtem tenzüktsüla aser sorkar schemes den tajangzük aliba sentong balala osang sangdongtsüla, ta metetdaktsü.
Laisa, national party ka ama BJP-i nübur telemsa kecha makai ajak ajungtsü atema inyaker, ta ashi.
Laisa parnok dang party jenjang ajungtsü atema State level Party officials den akokba tashi amalitepa inyaktsü aser ibaji ajanga state terenlok lenmangi anitsü ayongzük.
Iba senden nung general secretary Pelenguto Peseyie, Minority Morcha president Arvind Mishra aser frontal tentet balalai osang aguja liasü.
Iba senden ya Kohima District Unit vice president, Ruokuotuolie Kesiyie leniba nung agi aser district treasurer, Hanchule Jemu-i sarasadema iba sentong tenzük.
BJP Kohima district president, Seyiekhrielie Nagi-i lokti pelaa agizükba o jembi aser general secretary, Nelson Semy-i tepela anküp o jembia liasü.