Tang tenzüktsüla

Tsüngrem tenzüktsüba ya alu mapa temer mesüra kisüjensü mapa temer mesüra tanur ajak tain kümer mesüra tang teinyakdak mapa nungi anener tenzüktsü ta masü saka kodang jadir mesüra nungloktsüdir idangjisa tenzüktsüba mapa ka lir. Tsüngrem tenzüktsü ajaba aser bilemtetbaji Tsüngremi agütsüba maongka ta angateta idangjisa anidaktsüla mesüra inyaktsüla. Aji oda, asenok Khristan taküm nung inyaktsüba mapaji Yisu Khristai mulungba nung anidaktsü asü masü ta bilemdangtsübaji masü saka Pai inyakdaktsünüba mapaji idangjisa inyaktsüla. Yisu alima nung alidang nübortem rongnung pa mapa inyaka jajaba mapang, kenü anogo Pa sülen anidaker nisung kati Pa dang pa tebu aremtsü tama melaang ta mepishiba tatalokba otsü ka Mathi 8:21 nung shia angur. Iba otsü nung angatetba agi, Yisui iba nisung dang Pa sülen pa akaba ajak toktsür anidaktsü asoshi asüngdanger südi. Aji oda, iba nisung yagia ma tabo mashi saka pa teinyaktsü ali mapa ajak temer külenang Yisu sülen anidaknü. Yihuda nungertemi pei tsüraburtem kanga meimer, anungji kodang parnok tantsür tambur kümdir, pei chirnurtemi parnok masü tashi kanga junga anepalur aser sür külenang parnok pei leper nung kanga junga remadoktsür. Yisu dang pei tsürabur tama rema yutsüdi ta asüngdangbaji nisung tsütsübo shitak dang liasü. Laishiri ashiba agi, iba nisungi pa tebu tama rema yutsüdi ta asüba tetezüji tebuji ano masü taküm lir asütsüa akok, saka kanga tambur kümer tasür dang alinungji pa tebu akümli mapaji tama tobur junga tembangdakjang ta ashi südi. Ajisüaka, Yisu sülen anidaktsübaji asen alima mapa temer külenang ta masü saka ajak toktsür idangjisa anidaktsüla. Ibayongjiang, Yisui iba nisung dang ashi, ” Kü sülen anidakang aser tasürtemi pei tasür aremtsü tokjang.” Tetezü, paji Yisu sülen anidakyongbo tebuji aremtsü aoshibo tasütsü purtem rongnung nübo peria angutsü. Aji oda, Peteri Yisu dang, “Onoki onok akaba ajak toktsür nü sülen anidak,” ta Mathi 19 : 27 nung ashiba angutsü. Iba jagi Yisu sülen anidaker nütsüngtem tangatetba aser temulungtetba sayur. Asenok aikati yimten khen tenzüker külenang Tsüngrem tenzüktsü ta bilemer, mesüra kinungertem khen yaria lir külenang Tsüngrem mapa inyaktsü ta bilemer. Ajisüaka, asenoki asen mapangji memetet. Item ajakji Tsüngrem ket nung lir. Aji oda, kodang Tsüngremi asenok nem langka inyakdaktsünüa jadir, memenutsüla, kechiyong pai asen nüngdak ajak meteta lir. Tsüngremi asenok tenyaba tetezüji oagi kibong ka nung mesüra tesem ka nung lendong lir, kar tesamar lir, kar tekümtet, kar tesünep aser kar taneptsü aginüa atadar asütsüa akok. Ibaji meteta asenoki tashi angatsüla. Tsüngremi ashiba angaba nung temoatsü aser takok ajak keta lir. Atangji, asen taküm nung Tsüngremi ajaba metettsübaji kanga tongtibang lir. Tsüngremi ajabaji, ashiko, nisung kar ajanga Tsüngrem tenzüktsü ajungshitsüa akok, mesüra kar yaritsü mesüra kar den jungteptsü asoshi temulung nung jembitsüa akok. Itemji meteta asenoki idangjisa inyaktsüla. Tsüngremi ajadang melangzüba aser nungloktsüba mapa meinyaki süitemdaktsüba mapang tajungji kodanga tanaben meyipa marutsü. Ibayongji, Efesa 5:16 nung mapang tajung ajak alangzükang ta shia angutsü. Tetezü, tangar asoshi tajung inyaktsü anguba mapang ajakji Tsüngremi agütsüba mapang tajungji asütsü. Tsüngrem mapa inyaktsü asoshibo asüng aru matatsüla. Aji oda, nisung kati tebu remer külenang Yisu sülen anidaktsü bilemba ama asenok aikati pei chirnur tama züngtetter külenang mesüra pei tsüraburtem nüngdak tama ataloktsür külenang Tsüngremer mapa inyaktsü bilema alitsüa akok. Ajisüaka, bilemdangang, pei chirnur dang tama mesüra pei tsüraburem dang tama asenok anojungi oadokra koda tesasatsüka asütsü! Kodang Tsüngrem tenzüktsü jadir, idangjisa tenzüktsüla.