Tanga party nungi lenir tajungtemi AAP nung adentsüla: Sisodia

Panaji, September 07 (Agencies): Bodhbarnü AAP lenir aser Delhi Deputy Chief Minister, Manish Sisodia-i tanga party balala nungi lenir tajungtemi Aam Aadmi Party nung adentsüla, ta ayongzükogo.
Sisodia-i election agitsü aliba state, Goa anogo ananü atema semdanga lir aser pai, Goa nung AAP jenjang junga lir, kong sorkar tashi nung aliba BJP lenirtem dang “Ali Baba & 40 thieves” ta ajar, ta ashi.
“Party balala nung nisung tajunger jenti lir. Parnoki tejakleni arutsüla, AAP-i parnok pelaa agizüktsü,” ta pai ashi.
Goa nung RSS anemer lenir, Subhash Velingkar AAP-i pusemtsü asü ta pa dang asüngdanga liasü.
Sisodia-isa, “BJP aser Congress-i takok angutsüsa jenjang ka nung mali. Goa nung teimla mali ta bilema Congress pusemertemi atsünga ogo ta ni bilemer,” ta ashi.
“BJP-i maneni meranga inyaktsü, kechiyong parnok sorkar tashi nung lir,” ta AAP lenirisa ashi.
“Ni tesem kar ajanga aodang ni BJP lenirtem indang poster kar angu. Iba mapang nisungtemi kü dang ‘itemji tereprang’ ta ashi. Parnokji Ali Baba &  40 thieves lir ta ashi. Goa nung temelenshi tulu alitsü,” ta paisa shisem.