Tanga state nunga Patel quota atema lungkak aittsü: Hardik

New Delhi/Ahmedabad, August 30 (Agencies): Tanü Patidar Anamat Andolan Samiti Convenor, Hardik Patel-i, Patel nüburtem asoshi sorkar mapa aser educational institution tem nung quota akhangba lungkak tanga state tem nunga aittsü, aser lungkak aitba nung Kurmis o Gujjars kintema züngoktsü, ta metetdaktsü.
“Gujarat nung kechisa atalokogo, onoki ibaji national level nunga inyaktsü. State 12 nungi nübortem onok den lir,” ta Patidar upper caste community nung lenir arishi küm 22 Patel-i tanü metetdaktsü.
Iba dak sentakba nung Patel-i Kurmi, Koeri aser Gujjar kintem nungi lenirtem ajuruogo.
Gujarat nungi lanur lenir Patel-i prangpong ka amer tangokba noksa anogo ishika tejaklen linük osangkakettem kar nung adoka liasü aser pai par kin nübur lakh aika ayonger August 25 nü Ahmedabad nung lokti senden tulu ka kaogo.
Police-i pa apuba ajanga rara tulu adoka police ka densema nisung ter tashi süogo, aser tesülen security sepaitemi tensa azüokteta liasü.
“Iba ya (lungkak aitba) metre 100 asemtepba masü, saka marathon asemtepba ka lir. Iba lungkak ya küm 1-2 aittsü. State balala nung aliba ozü nübur crore 27 longjemtsüji kü nükjidong. Iba lungkak ya linük tesem ajak nung aittsüji kü nükjidong. Patel nüburtemi nüngdakba tesem ajaki ni aotsü,” ta pai ashi.
“Iba mapang nung tashiyim amshitsü nüngdak ta onoki melungtetra onoki ibaji inyaktsü. Kongsa item nüburtemi nüngdakdir yangji onoki highway mokdangtsü,” ta Patel-i Delhi Press Club nung osangbenertem dang ashi.
“Asüng onoki Lucknow aser Jantar Mantar nung lokti senden tulu ka ayongzüktsü. Onoki India nung Patels nüburtem dang tayongzükba agütsütsü,” ta pai ashi.
“Mapa wazüka ayuba ajanga iba linük ya küm taoba 60-i meyipa ogo aser super power linük ka akümtsü nung tetsükdaktsü bener arutsüogo. Marks junga nguaka admission magitetertemi reservation quota nüngdaker,” ta pai ashi.
“Reservation quota atema blueprint ka kodang junga adokdir, iba mapang nungji onoki linük tashi itshidaktsütsü aser jenjang temaba kati atutsü,” ta paisa shisem.