Tangalen azünger kaketshir 329-i scholarship akhanger

July 22, 2016 nü Civil Secretariat, Kohima nung Nagaland adena oor kaket reju balala nung azünger kaketshirtemi longkak aita scholarship akhangba noksa nung angur.

Kohima, July 23 (TYO): Nagaland adena oor tangalen College aser University balala nung azünger Naga nunger Scheduled Tribes kaketshirtemi tanü State Civil Secretariat nung state sorkar dang 2015-16 küm indang scholarship ajak agüjang ta mener longkak aita takhangba agütsüogo.
Naga nunger kaketshir 329 tenüng nung T. Thomas Konyak-i, taoba academic küm atema state sorkari ano scholarship ajunga agüja mali, ibayongji parnoki  kaket rejutem nung fees magütsüteter, kechiyong parnok teimbaka sensaker kibongtem nungi lir, ta ashi.
Item kaketshirtemi Union Ministry of Tribal Affairs-i agütsüba Post-Matriculation Scholarship Scheme (PMSS) ano mengui lir. Iba senji Centre-ibo agütsüogo ajisüaka state sorkari ano magütsüi lir.
Academic session tasenba atema admission tenzükogo, ajisüaka scholarship magütsüba ajanga kaketshirtemi taoba küm indang fees magütsüteter, ibayongji taküm atema admission agitsü menor, ta Thomas-i ashi.
Kaketshirtem jagisa Higher Education aser Technical Education Department nung Director tem dang temepishiba shidi ka nung sorkar dang scholarship agütsütsü atema mepishiogo.
Parnokisa, kaket rejutemi parnok dang tetsükdaktsü makai maneni azüngtsü atema tekaraba nung fees ajak agüjang ta rongshir, ta ashi.
Post Graduate kaketshirtem scholarship manguba ajanga parnok indang pass certificates aser marksheets-a magizükteter, ta parnokisa ashi.
Tanga state tem nungi kaketshirtemibo Centre-i agütsüba PMSS maongka junga agiteter, iba den kasa Nagaland nungi kaketshirtem nema kasa maongka agütsütsüla, ta kaketshirtemisa takhangba agütsü.
Kaketshir 329 rongnung DJ College of Engineering and Technology Modinagar (UP),  Mewar University Rajasthan, Adhunik, Ghaziabad UP aser IGI Haryana nung azüngertem densema lir.
State sorkari parnok nem scholarship menotsüra parnoki kechi junger ta bilemdir inyaktsü, ta longkak aitertemisa ashi.