Tangalen nungi ak bener marutsü tuyur

Dimapur, July 6 (TYO): Nagaland den kidanger state tem nung ‘African Swine Fever’ wara adoka aliba ajanga Nagaland telungi ak bener aruba maneni noktanger, ta Home Department-i tanü metetdaktsüogo.

Iba tetuyuba ya April 28, 2020 nü Department of Animal Husbandry & Veterinary Services-i agüja lir aser maneni ibaji nenshir, ta Home Department-i sangdong ka nung ashi.

Deputy Commissioner/CP Dimapur/Superintendent of Police/Chief Veterinary Officer temi iba mapa shitak inyaktsü atema nungloktsür, ta Home Department-isa metetdaktsüogo.

KARBI ANGLONG NUNG ‘AFRICAN SWINE FEVER’ POKTET

Taoba hopta Assam sorkari Karbi Anglong kübok yimtsüng asem aser temekettemji African Swine Fever adokdak ta osang sangoktsüogo.

“Lumbajong Block kübok Taralangso, Howrahghat Block kübok Phuloni aser Langsomepi Block kübok Langbungdingpi yimtsüngtemji African Swine Fever adokdak lir” ta Karbi Anglong Autonomous Council nung Additional District Magistrate, Rajeshan Terang-i ashi.

Yimtsüng asem temeket kilometre 1 telongtetji Infected Zones aser kilometre 10 telongtetji Surveillance Zones ta züngshir, ta Additional District Magistrate-isa metetdaktsüogo.

Iba tetuyuba alema inyakertem IPC nung arrla 188 kübok temerenshi alitsü, ta ADM-isa ashi.