Tangalen nungi nisung 754 tashi Dimapur tongogo

Dimapur, May 15 (TYO): Hokolbarnep New Delhi nungi special train ka ajanga nisung 62 tashi Nagaland tonga aruogo.
Tanep 1:45 ako meta parnok Delhi-Dibrugarh Rajdhani Express ajanga Dimapur railway station tonga aru.
Nisung 62 nungi 59 ji Nagaland nungi, Assam nungi 2 aser Manipur nungi 15 lir.
Külen, tanep 2:40 ako meta Dimapur railway station nung nisung 121 tashi train nung tua amen. Parnok rongnung Nagaland nungi 71, Assam nungi 21 aser Manipur nungi 23 liasü.
Linük kübok tesem balala nungi Nagaland-i meyipa arur ajak Agri Expo site-i anir ao aser idakji Covid 19 medical team-i temang tendanga reprang. Parnok ajak quarantine asütsü.
Maneni, Assam aser Manipur nungertem parnok sasa garitem anepalur pei pei talidaki ogo.
May 15, 2020 nü Meghalaya nungi nisung 333 aser Assam nungi nisung 17 Dimapur tonga aruogo.
Meghalaya nungi bus 14 aser Assam nungi nija gari 5 nung nisungtem aru.
Parnok ajak Agri Expo Dimapur nung reception center atongba sülen screen asü aser idak nung jagi quarantine center temi anir ao.
Iba osang zülu tashi nung Assam, Meghalaya, Andhra Pradesh aser Delhi nungi nisung 754 tashi Dimapur tongogo.