Tangar azü agiba sülen India nunger 2234 shi HIV mena

New Delhi, May 31 (Agencies) : Tesüiba ita 17 tsüngda nung tangar azü agiba sülen linük nübur nisung 2234 shi taneptsü mengutetba Human Immuno Deficiency Virus (HIV) tashidak menaogo.
Hindu osangkaket nung ashiba agi, azü agiba sülen iba tashidak menar Uttar Pradesh (UP) nung timba lir. Mozü kidang azü junga metendangi agütsüba ajanga Uttar Pradesh nung nisung 361 tashi iba tetsübutsü tashidak menaa lir. Azü junga metendangi agiba ajanga HIV menar UP sülen Gujarat nung nisung 292, Maharastra nung nisung 279 aser Delhi nung nisung 264 lir.
Right to Information-i asüngdangba ka langzüdang nübur ajungtsü atema inyaker Chetan Kothari-i, iba bushitetba osang ya National AIDS Control Organization (NACO) ajanga anguba lir, ta langzü.
“Sorkari AIDS nokdangba mapa ajak sen dak tsükdaker takok ngua meinyakteti lir. Tang ama tatalokba ya mapang shia meteter saka aibelenba mozüki aser blood bank tem dak kecha meinyaketer. Ibai tebilemtsü kanga tulu lir aser sorkari tekaraba nung teinyaktsü tim inyaktsüla,” ta Chetan Kothari-i ashi.
NACO 2015 osang ajanga ashiba agi, 2011 nung India nunger nisung lakh 20.9 dak HIV/AIDS (PLHIVs) keta aliba puteta liasü.