Tangar jaoka yur mak asütsü !

Küm shia aliba  Naga nunger külem benjong ‘Hornbill Festival’ atongtsü joko hopta asem dang lir. Iba benjongmong nung adentsü asoshi asenoki alima ajaklen nungi raliwalirtem arudaktsütsü asoshi osang sangdongogo. Yaküm küm tashi nunga alima tesem balala nungi raliwalirtem aika arua jangratema adenba osang angashiogo. Ano iba benjongmong nung adentsü asoshi bendangertem dang masü saka India tesem balala nungi tsümartema aika arur aser ano Nagaland nungia tesem balala nungi nisung aika arua iba benjongmong nung adener. Item raliwalirtemji asen lima nung aruagi anenzüka chiajema amongba senji asenok dangi arur, anungji rongsentsütsü benjong amongba tajangzükji aji lir. Ajisüaka, tangar jaoka yur asenok merenem, anungji mak asütsü. Tang aritepa Kohima yimdong yanglushi tenzükogo, saka hopta asem nungji Kohima yimti nung aliba lenmangtem ajakbo meyanglushitettsü. Ano, Dimapur nunga lenmang majungbatem yanglushi tenzükogo, saka Hornbill benjong tashi nunga Dimapur yimti yimdong ajakbo meyanglushitettsüa akok, kechiyong mapabo aika saka mapangbo mali. Shitakba agibo gari lenmangtem dang masü saka yimti nung aliba kiojen ajak merükmerüka sentsü dena melener  yimti yimdong nung street light yindong tashi topur junga yanglur aonung agi anüngdang küma light tsükloka alitsüla. Ajisüaka, asenok yimti yimdong tarok tapa agi sünger auyi alonga yangji raliwalirtem anir jajatsübaji taaktsüka asütsü. Bendang lima nungi arur ajak Dimapur ajanga Kohimai atutsü. Idangji Dimapur nungang auyi tapungba aser Kohima nungang tapungba ta auyi agi tesenzü majung kümra, asenoki tangar bendang lima nungi asen limai auyi achii aru ama asütsü. Iba ama auyi apongdak, kecha au ta mali, asenoki lenmang tezülen chiyongtsü yoka amentsü. Iba jagi tangar dang asenok jenjang (standard) sayur. Aji  oda, asenoki lenmanga junga meyanglutet ser alima ajaklen nungi raliwalirtem aser tulurtem jaokbaji parnok nem asenok menütsüdaktsütsü asoshi jaoker amai asütsü. Lenmang jungaka mejungaka, raliwalirtembo arutsü aser aotsü, saka asen lima nungi parnok aodang parnok nisung shia molungjang nung osang kakabosa bener aotsü. Ibaji Nagaland asoshi kanga tongtibang asütsü. Tang Nagaland sorkar inyakyim reprangdangra, Nagaland nung hornbill festival mali asübo küm tepiyong nunga lenmang kena meyanglushila ta bilemer. Aji oda benjong alitsü anasa, khen gari lenmangtema yanglushitsü asünungbo Hornbill festival ya Kohima nung dang masü saka tesem ajaklen kasa anogo nung iba kasa benjong ya amongtsüla. Iba amaji kodang Naga nunger kin shia pei pei district nung hornbill festival ya kadir, bendang tesem balala nung alir raliwalirtem Dimapur ajanga Kohimai arutsü aser idak nung jagi peii reprangnüba aser onüba district nung oa amongtsü. Atangji, lenmang dang junga lira, hopta ka nung Nagaland ajak sema  senzütettsü. Aji oda, tang Hornbill festival alitsü asüba agi tang joko amang agi sangwa küma aritepa lenmang yanglushiyonga aoba ama, Kohima aser Dimapur nung dang masü saka district headquaters tashi aoba lenmang ajak yanglushitsü. Hornbill benjong ya Naga nunger külem benjong asütsü atema Kisama yim kümteta yangji amonger. Ajisüaka, Kisama tashi otettertemi dang iba benjong ya metet. Anungji, ajak külem benjong süra yimtsüng ajak nung kibong shia iba benjongmong ya meteta amongtsüsa sorkar sentong alitsüla. Nagaland ya anüolen dang masü saka anüdoklen tulubalenka lir, anungji itemji liromedema terenlok mapa inyaktsübaji kanga tongtibang kümogo. Ashiko, raliwalirtemia Nagaland anülulen dang nungibo anüdoklen alir tereprangnüba asütsü. Item ajakji bilema kodang yimsüsür aser ketdangsertemi inyakdir, terenlok mapa agi Nagaland ka kümadoktsü aser tangar tsüngdang asenok ajak nümadanga nokdaktettsü.