Tangar Teyari Magizüker!

Tawa Kerala nung alima tzümopung lendong tulu ataloker state asentenshitsü mapang ka nung Centre sorkari senotsü peria magutsüteter, aser tanga linüktemi senotsü teyari agutsüdi ta asüngdangba-a magizüker. UAE, Maldives aser Qatar linüktemi senotsü aikati Kerala asentenshir yangerba nung yariteptsü melunga lir, ajisüaka Centre-i ‘tanga bendang linüktem dang nungi senotsü teyari magitsü’ ta tekong meranga nokdaker. Iba ya Kerala nunger atema osang tamajung ka asütsü. Kerala asentenshir yangertsü atema UAE-i US sen million 100, Qatar-i sen crore 35 aser Maldives-i US sen 50,000 tenla agutsütsü asüngdang, ajisüaka Centre sorkari magizük. Kanga nüngdakba mapang ka nung Centre sorkari senotsü teyari magizükba atema Kerala nung sorkar aser opposition lenirtem napronglai yimjak nung Modi-i aniba sorkar aitsüogo. Kerala nung tzümetsüng lendong ajanga sen crore 20,000 shi takoksa anguba asadangtetogo saka Centre sorkari sen crore 600 dang agutsü. Centre sorkari Kerala nem teyari peria magutsü, saka tangar nema meyaridaktsüner, ta asüba jakla angur. Alima tzümopong lendong yabo balaka, anungji iba nung yabo yimtenren maitdaktsüi takoksa anguba state ajak saku reprangtsüla. Ministry of External Affairs (MEA) otongdari sangdong ka ajanga, sorkar ‘policy’ nung ibaji mali (alima tzümopung lendong nung tangar dang nungi teyari meshitsü), Central sorkari Kerala nung nüngdakbatemji meranga abensatsütsü ta shiogo. Ajisüaka Kerala Chief Minister Pinarayi Vijayan-i Central sorkar indang National Disaster Management Plan (NDMP) nung iba ‘policy’ densema mali, ta jangjashitsü. 2016 küm National Disaster Management Plan ajanga ashiba agi, “Alima tzümopung lendong atalokdang India-i bendang linüktem dang teyari memeshitsü.” Ajisüaka kasa National Disaster Management Plan nung ‘tanga linük kari yaritsü asüngdangra Central sorkari agizüktsüa akok” ta shia lir. Anungji tongmelang agi ‘meshiba o tangari yaridi ta asüngdangba’ naji khenyongi balala ta angatettsü akok. Anungji tang amai alima tzümopung lendong balala ajanga takoksa tulu ajurudangbo tangari melungsoa agutsüba meshiba nungji kecha taaktsü mali. Takoksa tulu ajurudang tangari agutsüba teyari agiba nungji kecha maaksütsü mali, mesüra tangar takoksa tulu ajurudang asenokia nungnanga mesüi saka melungsoa tenlatsüla. Ajisüaka sorkari linük akhümket wazüka yunüdang Kerala nunger aoksar. Sorkari iba ‘policy’ ya meyanglushira tanü Kerala nungeri taoksa anguba ama  kenübo asenoka aoksatsü. Taoba mapangtem nung tanga linüktem nung alima lendong balala ajurudang India-i kanga ilonga yariba asenoki meteta lir, anungji tanü ama India aoksadang India-ia tanga teyari agutsübaji pelashishia agizüktsüla.