Varanasi, September 18 (Agencies): Ato kilonser Narendra Modi-i benokba sorkar mapatong ‘Jan Dhan Yojana’ dak sentakba nung Congress aija pai, “Küm 40 dak tema Bank nantionalize asüba sülen-a banking nung sensaker nem maongka magütsüi arurtemi (Congress) sorkar scheme koba ajanga mapang telatet ka nung sen crore 30,000 bener arutsüogo, iba osang asüngdanger,” ta ashi.
Modi adokba Lok Sabha constituency, Varanasi nung Hokolbar nü ricksaw lemtsüba sentong nung jembidang pai taoba sorkar aitsüba den külemi taoba sorkari küm 50 nung inyaktsü makokbaji pai ita 50 nung inyaktsü, ta ashi.
“Bank account kata melapoktsürtemi tangbo account maparen junga maor ta tebilemtsü kaa jembibaji ajanga ni süngmanger. Parnoki küm 50 nung meinyaktetbaji ni ita 50 nung inyaktsü, ta ashitsü atema ni yangli lir,” ta Modi-i ashi.
Minute 18 shi onük jembiba mapang Congress Party maneni aija Modi-i, “Asenoki küm 50 tashi ‘Garibi hatao’ yimyim angashia aruogo, ajisüaka sensak tia koktettsü atema kecha meinyaktet. Sensak tia indang dang jembiba ya yimya tentet ka kümogo, iba tia nungjagi adoktsüla,” ta ashi.
“Ni sorkar mesüra tanga party kecha maitsüner, ajisüaka sensakertem asoshi asentenshir tenzüktsü atema mapang tongogo,” ta pai ashi.
Sensak tia anema raratsü tajungtibaji shisaliok lir, anungji tsüraburtemi kechi südir süaka pei tanurtem school züngdaktsütsüla, ta pai ayongzük.
NDA sorkar-i teka mapa nung terenlok asoshi sentong balala benoka inyakba dak sentakba nung Ato kilonser-i, “Sensakertem teka mapa nung renloktsü atema teyari tila ka agütsüba ajanga parnok melungjang nung melung lemtetba kuliji ni yangi kar den jembidang nguogo. Rickshaw anir kati `skill development’ koda tongtibang, ibaji meteta kümogo,” ta pai ashi.
Tamalen tzünglu kanga aruba ajanga pai Varanasi semdangtsü aliba June 28 aser July 16 nü naprongla thinena liasü.
Tanep Uttar Pradesh Angh Ram Naik aser state chief minister Akhilesh Yadav nati LBS International Airport nung Modi agizüka liasü. Iba sülen pai ‘Jan Dhan Yojana’ scheme kübok e-rickshaw 101 aser bicycle rickshaw 501 lemja liasü.
You must be logged in to post a comment Login