Tangartemi Delhi indang tensa raksatsü: Arvind Kejriwal

New Delhi, February 26 (Agencies): Delhi nung CAA atema raratepdang nisung 27 tashi süogo aser tanü Chief Minister Arvind Kejriwal-i assembly nung “iba lendong ya Delhi nung alirtemi masü saka tangartemi adokdaktsüba lir” ta ashi.
“Delhi nung alirtemi ozüng alema inyakba magizüker. Iba lendong ya lokti anemer, yimten tashi abener aser tangartemi inyakba lir. Delhi nung aliba Hindu aser Muslim nungertemi meraranür” ta Kejriwal-i ashi.
Delhi sorkarisa Hombarnü lung agi onsetba Constable Ratan Lal’er kibong nem Rs 1 crore den sorkar mapa ka agütsütsü ta osang sangoktsüogo.
Bodbarnü Delhi High Court-i police dang BJP lennir asem- Kapil Mishra, Kapil Mishra, Anurag Thakur aser Parvesh Verma nungeri o tamajung jembiba atema FIR benokang ta tetuyuba agütsüogo.
Delhi High Court-i Solicitor General Tushar Mehta dang iba osang Police Commissioner nem sangoktsütsü tuyu.
Taoba anogo ana tsüngda Northeast Delhi nung ozüng alema mapa inyakba ajanga tensa mejungi lir aser iba asoshi Army mapa lemzüktsütsü, FIR tem benoktsü ken o tem tanü Delhi High Court-i angadang.
“Tesempatep adoktsü indang jembirtem anema Delhi Police-i mapa inyaktsüla” ta tanü Delhi HC-i ashi.
Parnoki, Delhi police commissioner dang Brihostibar nikongtsütsü 3:00 ako tashi nung telangzüba agütsütsü mapang atakzüktsüogo.
“Anogo ananü mepetmesü adoka raraba nung tasür ajak agi nisung 27 jungogo” ta Bodbarnü Guru Tegh Bahadur (GTB) Hospital-i metetdaktsü. Iba mozü kidang lendong nung yirur aika anir oa anepaludar.
Tanü Prime Minister Narendra Modi-ia süngjemtsü mepishia metetdaktsü aser tensa azüoktsü atema inyakdar ta ashi.
“Asenok atema yimjung aser putepa aliba nüngdaker. Delhi nung aliba kü adianutem dang teti yimjung nung aser adianu ama alitsü mepishir. Tekaratiba nung tensa süngjemdaktsütsü atema inyaktsüji kanga tongtipang lir. Delhi kübok tesem balala nung tensa osang metetpelaogo. Police aser ketdangsertemi tensa süngjemdaktsütsü atema inyakdar” ta PM Modi-i Twitter nung metetdaktsü.
“Northeast Delhi nung army nem mapa lemzüktsütsüla. Ni yasüng nisung aika den osang tongtepratepogo” ta Delhi Chief Minister Arvind Kejriwal-i tanü ashi.
Tanü Northeast Delhi nung aliba school ajak shibang aser iba tesem nungsa CBSE board exams thinena liasü.
Hombarnü Citizenship Amendment Act (CAA) pusemer telok ka aser anema noktaker telok ka tsüngda raradang Delhi Police constable ka aser civilian asem tashi asü.
Tensa tamajungba akümba agi, Union Home Ministry-i Delhi Police Special Commissioner (Law and Order) inyaktsü atema IPS officer SN Srivastava nem mapa lemzüktsü. Pa ya Central Reserve Police Force (CRPF) nungi anir aru.
Tanü nikongtsütsü Delhi Police-i ashiba agi, parnoki FIR 11 tashi benokogo.
Northeast Delhi nung tensa azüokogo, ta Delhi Police otongdar Mandeep Randhawa-i ashi.
Ministry of Information and Broadcasting-ia nija satellite television channels dang tensa raksatsü mesüra linük anema noktaktsü ajungmesoba osang, video aser noksatem mesangdongtsü atema tetuyuba ka agütsüogo.
National Security Advisor Ajit Doval nem Delhi tensa azüoktsü atema mapa lemzüktsüogo aser tanü pai tesem balala sema senzüba sülen Home Minister Amit Shah den ajurutepa osang metetpelatepogo.
Bodbarnü Chand Bagh tesem nung Intelligence Bureau officer Ankit Sharma indang tasümang angu. Pa ya Mongulbar nikongtsütsü kidangi meyipa aodang nisung telok kati zükset ta osang ajanga ashi.
Congress tir Sonia Gandhi-i iba tatalokba atema Centre aitsüogo. “Iba ya tasa ka atonga inyakba ajanga atalokba lir. Home Minister Amit Shah-i menden nungi alutsüla” ta Sonia-i ashi.
“Taoba hopta Home Minister kechi inyaka liasü? Home Ministry-i tensa mejungi akümba angudang kechiba paramilitary forces teyari magi?” ta laisa asüngdang.
“Iba khuret ya Home Minister dena Centre sorkari abentsü. Congress-i Home Minister mapa nungi anentsü akhanger” ta Sonia-i osangbener senden ka nung jembidang ashi. )